Amerika Birləşmiş Ştatları (ABŞ) ilə İran arasında danışıqlar yarımçıq qalarkən ABŞ mətbuatında diqqətçəkən bir xəbər yayılıb. Amerika mediasına görə, Rusiyanın müharibəyə qoşula biləcəyi iddia olunur. İddiaya əsasən Moskva Tehrana ABŞ-ın hərbi gəmilərinin və hərbi personalının yerləşdiyi mövqeləri göstərən peyk görüntüləri də daxil olmaqla kəşfiyyat məlumatları təqdim edib. Həmçinin, Rusiyanın İrana inkişaf etmiş pilotsuz uçuş aparatları göndərməyə hazırlaşdığı da irəli sürülür.
Elə bütün bunların fonunda da İranın xarici işlər naziri Abbas Əraqçı aprelin 27-si Rusiyaya səfər edib. İki ölkə arasında əlaqələr müdafiə, iqtisadiyyat və regional təhlükəsizlik sahələrində daha da dərinləşir.
Politoloq Turan Rzayev Zefer.media-ya açıqlamasında bildirib ki, Moskvanın Tehrana texnologiya və ya pilotsuz uçuş aparatları (dronlar) verməsi iddiası yeni deyil:
“Son illərdə bu iki ölkə arasında hərbi-texniki əməkdaşlıq artıq mövcuddur və qarşılıqlıdır. Yəni İran da eyni tərzdə Ukrayna müharibəsi fonunda Rusiyaya yardımlar edib. Sadəcə məsələ yardımların miqyası və açıq olub-olmamasıdır.
Ehtimal ki, Rusiya İrana bu səviyyədə və açıq dəstək göstərməyəcək. Çünki bu, Rusiyanın özü üçün də risklidir. ABŞ-la birbaşa toqquşma ehtimalını artırmaq Moskvanın hazırkı strateji maraqlarına uyğun gəlmir. Rusiyanın İrana kəşfiyyat məlumatı verməsi, xüsusilə ABŞ hərbi mövqeləri barədə, faktiki olaraq dolayı şəkildə münaqişəyə qoşulmaq kimi qiymətləndirilə bilər. Bu isə klassik “proxy qarşıdurma” modelinə uyğundur.
Ona görə də “Rusiya müharibəyə girir” demək düz deyil. Bunu daha çox böyük güclər arasında gərginliyin yeni mərhələyə keçməsi, yəni açıq yox, dolayı qarşıdurmanın dərinləşməsi kimi qiymətləndirmək olar”.
Zərintac Mayisqızı
