Yunanıstanın Avropa İttifaqında ən yüksək dövlət borcuna malik ölkə statusunu yaxın illərdə itirə biləcəyi bildirilir.
Zefer.media xəbər verir ki, ölkədə borcun ümumi daxili məhsula nisbəti son illərdə davamlı şəkildə azalır.
Yunanıstan uzun müddət Aİ-də ən borclu ölkə kimi tanınıb. Lakin son dövrdə həyata keçirilən maliyyə intizamı tədbirləri və iqtisadi sabitləşmə siyasəti nəticəsində borc yükü tədricən aşağı düşür. Eyni zamanda, digər Avropa ölkələrində, xüsusilə İtaliyada dövlət borcunun yüksək səviyyədə qalması bu balansın dəyişməsinə səbəb olur. Bu tendensiya davam edərsə, Yunanıstan artıq ən yüksək borc göstəricisinə malik ölkə olmayacaq və bu statusu İtaliyaya verə bilər.
Qeyd olunur ki, Yunanıstan iqtisadiyyatı böhrandan sonrakı mərhələdə bərpa prosesini davam etdirir və bu da dövlət maliyyəsinin yaxşılaşmasına müsbət təsir göstərir. Borcluluq göstəricilərində müşahidə olunan enmə Avropa İttifaqında fiskal vəziyyətin dəyişdiyini göstərir və yaxın illərdə borc üzrə lider ölkələrin sıralamasında dəyişikliklər gözlənilir.
Zərintac Mayisqızı
