Uşaqlar üçün olan “Humana” qidasının içindən həşərat çıxdığı iddia edilir.
Zefer.media xəbər verir ki, görüntülər sosial şəbəkələrdə paylaşılıb.
“Yenə eyni qidanı aldıq. Düşündük ki, böcəklər bəlkə evdədir. Ona görə də açıb yoxladıq. Yox gördük ki, bu yeməyin içindən çıxır“, – Vətəndaş bildirib.
O “Humana”nı “Kanon” aptekdən aldığını yazıb.
Qida Təhlükəsizliyi Agentliyi “Qafqazinfo”ya cavabında məsələnin nəzarətə götürüldüyünü və araşdırma aparılacağını vurğulayıb.
Ümumiyyətlə süni uşaq qidaları ilə əlaqədar zaman-zaman narazılıqlar ortaya çıxır. Ən çox şikayətlər tərkibinin zərərli olmasından irəli gəlir. İndi də həşəratlar problemi ortaya çıxdı.
Bəs görəsən, yazıq valideynlər nə etsin? Bu yeməklərə necə etibar etsinlər? Bir tərəfdən maddi durumu o qədər də yaxşı olmayan ailələr də var ki, həmin qidaları məcbur alırlar. Maddi sıxıntılarla yanaşı bu dərdi də mi çəksinlər ?
Çünki hər zaman ana südü yetərli olmur, ya da bəzən heç gəlmir. Son ümid yeri süni qidalar qalır. Onu da körpənin sağlamlığını nəzərə almadan hazır edəcəklərsə, ya da içindən böcək və yaxud başqa cisim çıxacaqsa və bütün bunlara düzgüncə nəzarət edilməsə övladlarımızı necə qoruyaq?
Zərintac Mayisqızı
