Taksi sürücüləri və sərnişinlər arasında çox yaşanan problemlərdən biri də taksinin düzgün ünvana gəlməməsidir. Son dövrlər tez-tez belə neqativ halla rastlaşırıq. İnsanların çoxu sürücüləri, ya da proqramı, sürücülər isə onları günahlandırır.
Bəs həqiqi günahkar kimdir?
Nəqliyyat məsələləri üzrə ekspert Eldəniz Cəfərov Zefer.media-ya açıqlamasında deyib ki, taksi sürücüləri ilə müştərilər arasında yaranan konfliktin əsas səbəbkarı bəzi taksi operatoru şirkətləridir:
“Onlar bu işi yüksək səviyyədə təşkil etməlidirlər, çünki bu, həmin qurumların birbaşa vəzifəsidir. Sürücülər gileylənir ki, onlara göstərilən xidmətə görə alınan komissiya haqqı olduqca yüksəkdir, təxminən 25, bəzən də 30 faiz alınır. Sonra şikayət edirlər ki, sərnişin tərəfindən ödənilən qeyri-nağd ödənişlər şirkətin hesabına gedir. Həmin pulu da sürücüyə gec verirlər, o da narazılıq yaradır”.
Ekspertin sözlərinə görə, sürücü mənzil başına gedib çatana qədər yazılan məbləğ göstərmir və mənzil başına gəldikdən sonra bilgi əldə edir:
“Belə bir qarışıqlıqlar da yaşanır: Məsələn taksi görür ki, ünvana 15 dəqiqəyə yetişəcək. Ancaq müştərinin mobil tətbiqində sürücünün 5 dəqiqəyə gələcəyi yazılır və s. kimi mənfi nüanslar…
Ümumiyyətlə sərnişinlər hər hansı problemlə üzləşəndə hüquqlarını qorumaq üçün Antiinhisar və İstehlak Bazarına Nəzarət Dövlət Agentliyinə müracət etməlidirlər”.
Zərintac Mayisqızı
