Cənubi Koreyanın Ticarət naziri Yo Han-gu qlobal problemlərin birgə həlli məqsədilə Cənubi Koreya ilə Avropa İttifaqı (Aİ) arasında iqtisadi tərəfdaşlığın gücləndirilməsinin vacibliyini vurğulayıb.
Zefer.media “Yonhap” agentliyinə istinadla xəbər verir ki, bu barədə görüş Seulda keçirilib.
Tədbirdə “Mercedes-Benz”, “Volkswagen Group”, “Copenhagen Offshore Partners”, “P&G”, “L’Oreal”, “Air Liquide” və “ASML” daxil olmaqla, avtomobil, infrastruktur, yarımkeçiricilər və istehlak malları sektorlarında fəaliyyət göstərən Avropanın təxminən 40 böyük şirkətinin nümayəndəsi iştirak edib.
Yo Han-gu bildirib ki, Cənubi Koreyanın yüksək texnologiyalı sənayelərdə qlobal rəqabət qabiliyyətini Aİ-nin beynəlxalq liderliyi ilə birləşdirməsi əhəmiyyətli sinerji yaradacaq. Nazir strateji minerallar, təchizat zəncirləri və qabaqcıl texnologiyalar sahəsində əməkdaşlığın genişləndirilməsinin vacibliyini xüsusi vurğulayıb.
O əlavə edib ki, sözügedən əməkdaşlıq hər iki iqtisadiyyata ABŞ və Çin arasında texnoloji rəqabətin güclənməsi, təchizat zəncirlərindəki qeyri-müəyyənlik və iqtisadi-təhlükəsizlik məsələlərinin artan qarşılıqlı əlaqəsi kimi qlobal ticarət çağırışlarına daha effektiv cavab verməyə imkan yaradacaq.
Nazir həmçinin Avropa şirkətlərinin Cənubi Koreya bazarına çıxışını yaxşılaşdırmaq məqsədilə Aİ ilə məsləhətləşmələri davam etdirəcəyini deyib.
Aytən Yalçınqızı
