Bu gün biz Masallı rayonunun Viləş kəndində önəmli və mənəvi dəyər baxımından çox əhəmiyyətli bir hadisənin şahidi olduq. Vətən uğrunda canlarından keçmiş iki igid qardaş, Aprel döyüşləri şəhidi Nurlan Əsgərli və qardaşının qisasını alaraq Şuşada şəhid olan İntiqam Əsgərli qardaşlarının əziz xatirəsinə yaradılan “Şəhid Qardaşları” Ev Muzeyinin açılışında Zefer.media komanadası olaraq biz də iştirak etdik.
Tədbirdən öncə rəsmi qonaqlar və ictimaiyyət nümayəndələri qəhrəman qardaşların məzarını ziyarət edərək, ruhlarına dualar oxuyub, məzarları önünə tər çiçəklər düzüblər.
Bu muzey sadəcə bir xatirə məkanı deyil. Bu, qəhrəmanlığın, fədakarlığın və vətən sevgisinin canlı təcəssümüdür. Muzeydə nümayiş olunan şəxsi əşyalar, fotolar və həyat hekayələri gələcək nəsillərə örnək olacaq, onların vətənpərvərlik ruhunda böyüməsinə böyük töhfə verəcəkdir.
Tədbirə Masallı Rayon İcra Hakimiyyətinin başçısı Araz Əhmədov, Milli Məclisin Masallı rayonu üzrə millət vəkili Məşhur Məmmədov, Xüsusi Təyinatlıların qaziləri, “Şəhid ailələri və veteranları” İctimai Birliyinin sədri Bəhruz Məmmədzadə, “İnkişafa və islahatlara dəstək” İctimai Birliyinin sədri Ramil Əliyev, şəhid ailələri, qazilər və ictimaiyyət nümayəndələri qatılıblar. Bu, şəhidlərimizin xatirəsinə verilən yüksək dəyərin bariz nümunəsidir.
Şəhidlərimiz bizim qürur yerimizdir. Onların keçdiyi şərəfli yol bir daha sübut edir ki, xalqımız hər zaman Vətənin müdafiəsinə hazırdır. 44 günlük Şanlı Vətən müharibəsinə gedən yol da məhz Aprel döyüşlərindən keçib və həmin tarixlər qəhrəmanlıq salnaməmizin ayrılmaz hissəsidir.
Bu gün burada toplaşmağımızın əsas məqsədi yalnız onları xatırlamaq deyil, eyni zamanda mərd oğulların ideallarını yaşatmaq, gələcək nəsillərə ötürməkdir.
Bir daha bütün şəhidlərimizi dərin hörmət və ehtiramla yad edirik. Allah onlara rəhmət eləsin, ruhları şad olsun!
