Ermənistanın Baş naziri Nikol Paşinyanın Kremldə Vladimir Putinin təklif və təhdidlərinə açıq, sərt ritorika ilə cavab verməsi iki ölkə arasında münasibətlərdə ciddi gərginlik yaradıb. Paşinyanın Putinin maraqlarına uyğun hərəkət etmək istəməməsi Rusiya liderinin də boş durmayacağı deməkdir.
Zefer.media xəbər verir ki, Milli Cəbhə partiyasının başqanın müavini, siyasi ekspert Məhəmməd Əsədullazadə bu barədə öz “Facebook”səhifəsində bildirib:
“Görünür ki, V. Putin N. Paşinyanın bu qədər kəskin və arqumentli mövqe sərgiləyəcəyini gözləmirdi. Əgər N. Paşinyan qarşıdakı seçkilərdə qələbə qazanarsa, Ermənistanın Rusiyanın təsir orbitindən çıxması istiqamətində daha radikal addımlar atacağı istisna deyil. Onun hazırkı sərt ritorikasının gələcəkdə real siyasi qərarlarda tətbiq olunacaq.
Hazırda Rusiya–Ermənistan münasibətlərində ciddi çatlar yaranıb və proseslərin daha dərin böhran mərhələsinə keçəcəyi gözlənilir. N. Paşinyan Rusiyanın Ermənistanın daxili işlərinə müdaxiləsini və Qarabağ məsələsini yenidən gündəmə gətirməsini ölkəsinin suverenliyinə təzyiq kimi qiymətləndirir. Bu baxımdan, onun sərt cavabı həm daxili auditoriyaya, həm də Moskvaya ünvanlanmış siyasi mesaj kimi dəyərləndirilə bilər”.
Siyasi ekspert vurğulayıb ki, Kremlin Ermənistanda siyasi müxalifətə-R. Koçaryan və S. Karapetyana dəstəyi münasibətlərində ənənəvi təsir alətlərindən istifadə etdiyini də göstərir:
“Qarşıdakı dövrdə Rusiyanın İrəvana təzyiqlərinin artacağı gözlənilir. 7 iyun tarixində Ermənistanda baş verəcək siyasi proseslər isə təkcə ölkədaxili vəziyyətə deyil, bütövlükdə Cənubi Qafqazda sülh və təhlükəsizlik mühitinə ciddi təsir göstərə bilər.
Rusiya Ermənistanda 102-ci hərbi bazadan istifadə etmək cəhdləri istisna deyil”.
Zərintac Mayisqızı
