Litvanın Vilnüs beynəlxalq hava limanında uçuş və eniş əməliyyatlarına müvəqqəti məhdudiyyət qoyulub.
Zefer.media xəbər verir ki, bu barədə “Delfi” portalı məlumat yayıb.
Bildirilib ki, yerli vaxtla saat 21:56-dan 22:55-dək (Bakı vaxtı ilə 23:56-dan 00:55-dək) tətbiq edilən bu qərar Belarus istiqamətindən hava yolu ilə qaçaqmalçılıq fəaliyyətinin aşkarlanması ilə əlaqədar olub.
İnsident zamanı hava limanı qısa müddətə bağlansa da, ümumi uçuş cədvəlinə ciddi zərər dəyməyib. Məhdudiyyətlər səbəbindən göyərtəsində 145 sərnişin olan yalnız bir təyyarə Kaunas hava limanına yönləndirilib və orada yanacaq doldurduqdan sonra yenidən Litva paytaxtına yola düşüb.
Saat 23:00 radələrində bütün məhdudiyyətlər aradan qaldırılıb və hava limanı normal iş rejimini bərpa edib.
Gecə saatlarında London Siti – Vilnüs reysi də daxil olmaqla, nəzərdə tutulan bütün uçuşlar maneəsiz həyata keçirilib. Rəsmilər hadisənin sərnişinlərə demək olar ki, heç bir mənfi təsir göstərmədiyini vurğulayıblar.
Aytən Yalçınqızı
