Azərbaycan Prezidenti İlham Əliyev Şamaxıda yerləşən “Şirvan Aqro” heyvandarlıq kompleksinin kollektiviylə görüşündə bildirib ki, müəssisənin yaradılması yüzlərlə iş yeri açır və əla iş şəraiti təmin edir. “Bu müəssisə həm Şamaxı rayonunda, həm də ölkəmizdə kənd təsərrüfatının inkişafı üçün böyük əhəmiyyət daşıyır”, – deyə Prezident qeyd edib.
Zefer.media xəbər verir ki, Prezident İlham Əliyev bildirib ki, kompleks yalnız Azərbaycanda deyil, Cənubi Qafqazda da ən iri ət-süd təsərrüfatıdır.
“Hal-hazırda idxalın azaldılması istiqamətində işlər aparılır. Biz ət, süd və süd məhsulları ilə 100 faiz təmin olunmalıyıq. Bu hədəfə yaxın olsaq da, hələ tam nail olmamışıq. Belə müəssisələrin fəaliyyətə başlaması bu məqsədin həyata keçirilməsinə imkan verəcək və gələcəkdə ət və süd məhsullarını hətta ixrac etmək imkanımız yaranacaq”, – deyə Prezident bildirib.
Dövlət başçısı qeyd edib ki, kompleksdə iş şəraiti mükəmməldir və burada kənd təsərrüfatı ilə məhsulların emalı sahəsində ən müasir texnologiyalar tətbiq olunur: “Burada qabaqcıl şirkətlərin texnologiyaları istifadə olunur. Tətbiq edilən iş prosesi yüksək səviyyədədir. Bu müəssisə həmçinin Şamaxı rayonunda məşğulluğun artmasına böyük töhfə verəcək”.
Prezident vurğulayıb ki, Şamaxı rayonunda genişmiqyaslı işlər aparılır və rayon ölkənin turizm mərkəzlərindən birinə çevrilib. Müasir istirahət zonaları, otellər, ictimai iaşə, mədəniyyət və təhsil obyektləri yaradılıb. Şamaxı–Bakı avtomobil yolu ən müasir standartlara cavab verir. “İndi həm Bakı, həm də ölkənin qərb, şimal-qərb regionları ilə nəqliyyat əlaqələri üçün yeni imkanlar yaranıb. Hal-hazırda Şamaxı–İsmayıllı–Qəbələ yeni avtomobil yolu tikilir. Oradakı körpü ölkəmizdə ən iri körpü olacaq və ehtimal ki, gələn il istifadəyə veriləcək. Ölkə ərazisində nəqliyyat əlaqələrinin gücləndirilməsi ilə bağlı məsələlər də həll olunur. Məqsədimiz vətəndaşların həyat səviyyəsini yaxşılaşdırmaq, iş yerləri yaratmaqdır”, – deyə Prezident əlavə edib.
Prezident İlham Əliyev qeyd edib ki, bayram günlərində belə müəssisənin açılması böyük simvolik əhəmiyyət daşıyır :“Bu günlərdə həm Ramazan, həm də Novruz bayramını qeyd etdik və ölkə ərazisində çox isti və xoş ab-hava hökm sürür. Əsas səbəb ölkəmizin inkişafıdır; biz xalq olaraq qalib kimi yaşayır və gələcəyə böyük nikbinliklə baxırıq”.
İlham Əliyev görüşün sonunda kollektivə uğurlar arzulayıb və onları təbrik edib.
