Ermənistan Xarici İşlər naziri Ararat Mirzoyan Milli Məclisdə jurnalistlərin qarşısında keçirdiyi brifinqdə Baş Nazir Nikol Paşinyanın bəyanatına toxunub. Paşinyan demişdi ki, əgər hakimiyyətə müxalif qüvvələr gələcəksə, Ermənistan 2026-cı ilin sentyabrından gec olmayaraq yeni müharibə ilə üzləşəcək.
Zefer.media xarici mətbuata istinadən xəbər verir ki, nazirə sual verilib ki, “Baş Nazir bu tarixi necə müəyyən edib və bu, şantaj xarakteri daşımırmı ? ” Mirzoyan isə cavabında deyib:
“Mən düşünürəm ki, Baş Nazir tərəfindən qeyd olunan tarix şərtidir, yəni o, seçkilərdən qısa müddət sonrasını nəzərdə tutur. Və belə bir perspektivanın real ola biləcəyinə şübhə yoxdur. Bəzi müxalif dairələrin ideologiyası belədir ki, demək olar ki, bütün qonşu ölkələrlə ərazi məsələlərimiz var, ərazi iddiaları və ambisiyaları mövcuddur. Açıq-aşkar görünür ki, belə düşüncə tərzinə malik insanlar hakimiyyətə gəlsələr, dərhal qonşularla problemlər yaranacaq. Və bu gün ölkələrin problemləri həll etmək metodologiyasını nəzərə alsaq, Ermənistan dərhal müharibə ilə üzləşə bilər. Biz deyirik ki, ölkəmizə sülh lazımdır. Digər şərtlərdə isə biz dərin inamla hesab edirik ki, Ermənistanın uğuru, inkişafı yox, elə Ermənistanın müstəqil dövlət kimi mövcudluğu belə böyük sual altında olacaq. Sülh – bizim Ermənistan vətəndaşlarına təklifimizdir, və paralel bir təklif var: “Xeyr, bizə bu Ermənistan lazım deyil, bizə fərqi yoxdur, bizə başqa bir Ermənistan lazımdır”. Bizim təklifimizdə şantaj elementi görürəmmi? Xeyr, görmürəm. Niyə belə deyirik? Yaxşı edirik. Bu, Ermənistan vətəndaşlarına təklifimizdir”.
Baş Nazirliyə qarşı “mövcud hökumət xalqı müharibəyə sürükləyib” iradına isə Mirzoyan bildirib ki, onların hökuməti müharibə yaratmayıb və müharibə 30 ildən çox səhv siyasətin nəticəsidir.
