Hörmüz Boğazındakı gərginlik aprel ayında əldə olunan atəşkəsi pozmaq həddinə çatdırıb.
Zefer.media “TRT Xəbər”ə əsasən bildirir ki, Donald Trampın yeni blokada qərarı və gəmilərdən tələb etdiyi 20 faizlik ödəniş bazarlarda narahatlıq yaradarkən, böhranın aradan qaldırılması üçün diqqətlər iki ölkə arasında aparılan telefon danışıqlarına yönəlib.
Yaxın Şərq və Körfəz bölgəsində son dövrlərdə baş verən hadisələr aprel ayında əldə olunan atəşkəsin davamlılığı ilə bağlı müzakirələri yenidən gündəmə gətirib. ABŞ administrasiyasından ard-arda verilən açıqlamalar və hərbi aktivlik “Bölgə yenidən əvvəlki böhran günlərinə qayıdırmı?” sualını aktuallaşdırıb.
TRT Xəbərin Vaşinqton müxbiri Tuna Şanlının verdiyi məlumata görə, bölgədəki vəziyyəti dəyərləndirən ekspertlər ABŞ və İran rəsmilərinin qarşılıqlı sərt bəyanatlarının atəşkəsdən əvvəlki qarşıdurma mühitini yenidən canlandırdığına diqqət çəkirlər. Diplomatik mənbələr hər iki ölkənin pərdəarxasında telefon diplomatiyasını davam etdirməsini “az da olsa ümid işığı” kimi qiymətləndirsələr də, sahədəki vəziyyət gərginliyin ən yüksək həddə çatdığını göstərir.
Lalə Qurbanlı
