Günümüzün ən böyük problemlərindən biri də yeniyetmələrin kriminal dünyaya maraq göstərməsidir. Yaşlarına uyğun gəlməyən silahlı və s. oyunlar telefon vasitəsilə oynayır, böyüklərin baxdıqları mafiya məzmunlu, ümumiyyətlə müxtəlif seriallara baxır və sosial şəbəkələrdən də istifadə edirlər. Nəticədə psixologiyaları mənfi istiqamətdə formalaşmağa başlayır.
Psixoloq Aytən Ələkbərova Zefer.media–ya açıqlamasında deyib ki, yeniyetmələrin bəziləri “Eşref Rüya”dakı “Eşref”, “Kurtlar Vadisində”ki “Polat”, “Süleyman Çakır” və s. kimi kriminal, mafiya xarakterli serialların baş rol və önəmli obrazlarına oxşamaq istəyirlər:
“Sanki özünü təsdiq etməyə çalışırlar, xüsusilə bir çox yeniyetmə oğlanlar kişi anlayışını bu cür dərk etməyə başlayırlar. Yeniyetmədən nə ağıl, nə də tərbiyə gözləməmliyik. Burada onların hormonal dəyişiklikləri nəzərə alınmalıdır. Hər birində başqa xarakterlər ortaya çıxır. Doğrudur, bəzən söyləyirik ki, hər şey ailədən gəlir, amma cəmiyyətdə də pozulan az uşaqlar olmayıb. İnsan alverinin, narkomaniyanın və s. qurbanına çevrilən azyaşlılar təəssüf ki, kifayət qədərdir. Yeniyetməlik dövründə yaranan xarakter və xüsusiyyət onların gələcəkdə kim olacağını əksər vaxt göstərir.
Psixoloq əlavə edib ki, valideyn övladı ilə dost olmaqla yanaşı, müəyyən sərhədi də qorumalıdır:
Uşaq düşünsün ki, “səhv bir şey etsəm anam, atam buna etiraz edəcək”. Ona görə valideyn nəzarəti doğru metodla həyata keçirilməlidir. İstər telefon, televizoru izləmək məsələsi, istərsə də mühit, yaxud da digər məqamlarda düzgün istiqamət çox vacibdir. Övladının möhkəm iradə və sağlam psixologiya ilə cəmiyyətə hazır olması hər bir ata və ananın prioritet hədəfi sırasında yer almalıdır”.
Zərintac Mayisqızı
