“Bu aylarda çox halsız oluram, davamlı yuxu istəyi gəlir”, “yaz depressiyası yaşayıram” və s. kimi cümlələri yaz mövsümündə bir çox şəxsdən eşidirik. Əslində bu fəsildə hər şey yenilənir, təbiət oyanır, ağaclar çiçək açır, yaşıllaşır, hər yan al-əlvan rəngə boyanır. Sanki yeni nəfəs gəlir. Lakin bəzi insanlar təssüf ki, əksini yaşayır. Həvəssizlik, halsızlıq, depressiyaya düşürlər və müxtəlif ağrıları olur.
Psixoloq Gövhər Məmmədova Zefer.media – ya açıqlamasında deyib ki, sözügedən ağrılar ruh halımıza da təsirsiz ötüşmür:
“Havaya daha həssas olanlar həmin durumdan daha çox şikayətlənir. Səbəbləri odur ki, baharda havalar isinir, havada elektrik yükünün miqdarı artır. Bu artım ilə əlaqədar insanlarda maddələr mübadiləsi də çoxalır. İsti havaya keçid etdikdə damarlarımızda genişlənmə yaranır və nəticədə ağrılar əmələ gəlir. Beləliklə, iş qabiliyyətimiz aşağı düşür. O cümlədən günlərin uzanması ilə əlaqədar yuxusuzuq problemləri ortaya çıxır”.
Psixoloq yaz yorğunluğundan çıxmaq yollarını belə izah edib:
“7-8 saat yuxuya getməliyik, günəş altında mümkün qədər vaxt keçirməliyik. Gəzinti də ən çox məsləhət gördüyümüz metodlardandır. Mütləq şəkildə idmanla məşğul olmalıyıq. Beləliklə bədənimizi sözügedən mövsümə uyğunlaşdıra bilərik. Günəş bizdə serotoninin miqdarını artırır. Xoşbəxtlik hiss edirik, yuxuya daha az ehtiyac duyuruq. Qeyd olunan neqativ vəziyyət maksimum 1 ay davam edir. Əgər ağrılar, şikayətlər bitmirsə bunu bahar yorğunluğu altında gizlətmək əvəzinə mütəxəssislərə – həkimə, psixoloqa müraciət olunmalıdır”.
Zərintac Mayisqızı
