İran ABŞ və İsrailin zərbələri nəticəsində zədələnmiş raket sənayesini yenidən bərpa etməyə başlayıb.
Zefer.media xəbər verir ki, bu barədə “The Wall Street Journal” nəşri məlumat yayıb.
ABŞ və Yaxın Şərq rəsmilərinin bildirdiyinə görə, hazırda Tehran əvvəlcədən ehtiyatda saxladığı komponentlərdən istifadə etməklə ballistik raketlər yığır.
Bildirilib ki, fəaliyyət bir sıra yeraltı obyektlərdə, o cümlədən Tehranın cənub-şərqində yerləşən Xocir raket kompleksində müşahidə olunur. İranın həm maye yanacaqlı, həm də bərk yanacaqlı ballistik raketlərin yığılmasını bərpa etdiyi deyilir.
Qeyd edilib ki, ABŞ və İsrailin əvvəlki zərbələri İranın raket komponentlərinin istehsalı üçün istifadə olunan bir sıra sənaye obyektlərinə ciddi ziyan vurub. Buna baxmayaraq, Tehran mövcud ehtiyatlardan istifadə etməklə daha məhdud həcmdə raket istehsalını davam etdirir və yeni yeraltı yığım məntəqələri yaratmağa çalışır.
Zərintac Mayisqızı
