Şənbə günü axşam Vaşinqtondakı Hilton Otelində keçirilən illik Ağ Ev Müxbirləri Assosiasiyasının şam yeməyində baş verən atışmadan sonra bir sıra ölkə liderləri ABŞ prezidenti Donald Trampa dəstək mesajları paylaşıb.
Zefer.media xəbər verir ki, bu barədə “Azad İran” məlumat yayıb.
Pakistan, Yaponiya, Hindistan, Kanada və Meksika da daxil olmaqla bir neçə ölkənin rəhbərləri “X” hesablarında Tramp və ABŞ administrasiyasına həmrəylik ifadə edən açıqlamalar yayımlayıblar.
Hadisə Pakistanda ABŞ–İran danışıqlarının ikinci mərhələsinin başlanması üçün aparılan məsləhətləşmələr fonunda baş verib. Pakistanın baş naziri Şahbaz Şərif paylaşımında Vaşinqtonda yaşananları “kədərli hadisə” adlandıraraq yazıb: “Vaşinqtondakı bu kədərli hadisədən dərin sarsıldım”.
Hadisədən sonra açıqlama verən Donald Tramp isə atışmanın İranla müharibə ilə motivasiya olunduğuna inanmadığını bildirib. O, eyni zamanda vurğulayıb: “Bu hadisə mənim İranla müharibədə qalib gəlməyimə mane olmayacaq”.
Zərintac Mayisqızı
