Türkiyə Prezidentinin baş müşaviri Seyit Sertçelik “Türk dünyası dialoqları: ortaq gələcək, ortaq baxış” mövzusunda keçirilən panel iclasında çıxış edərkən bildirib ki, Azərbaycan hazırda qlobal səhnədə öz sözünü deyən çox güclü bir ölkədir.
Zefer.media Trend-ə istinadən xəbər verir ki, o, dövlət başçılarının Türk Dövlətləri Təşkilatının inkişafında mühüm rol oynadığını qeyd edib.
“Türk Dövlətləri Təşkilatı hazırda beynəlxalq arenada mühüm bir aktor kimi formalaşır. Təşkilat olaraq biz bölgədə sülh və sabitlik naminə səy göstəririk. Bu gün dünyada müxtəlif təhdidlər mövcuddur. Belə bir dövrdə birliyimiz böyük əhəmiyyət kəsb edir. Biz yalnız bölgədə sülh və sabitliyin təmin olunması istiqamətində çalışırıq”, – deyə müşavir əlavə edib.
Bakıda Türkiyə Prezidenti Administrasiyasının Kommunikasiya İdarəsinin təşkilatçılığı ilə “Türk dünyası dialoqları: ortaq gələcək, ortaq baxış” mövzusunda panel müzakirəsi keçirilir.
İclasda Türkiyə Prezidenti Administrasiyasının Kommunikasiya İdarəsinin və Azərbaycanın rəsmi şəxsləri, deputatlar, hər iki ölkədən ekspertlər və media nümayəndələri iştirak edirlər.
Panel çərçivəsində türk dünyasında əməkdaşlığın inkişafı, ortaq baxışın, ümumi dəyərlərin və ortaq gələcəyin formalaşdırılması, informasiya və kommunikasiya sahəsində qarşılıqlı əlaqələr, eləcə də qlobal çağırışlar fonunda türk dövlətləri arasında əlaqələrin daha da gücləndirilməsi məsələləri müzakirə olunur.
