ABŞ Prezidenti Donald Tramp Polşaya əlavə 5 min amerikalı hərbçinin göndəriləcəyini bəyan edib. O, həmin qərarı Polşa ilə münasibətlərin möhkəmləndirilməsi və prezident Karol Karol Navrotski ilə əməkdaşlıqla əlaqələndirib.
Vurğulayaq ki, Amerika Birləşmiş Ştatları və Polşa arasında münasibətlər əsasən hərbi, siyasi və iqtisadi əməkdaşlığa əsaslanır. Polşa NATO daxilində ABŞ-ın Avropadakı ən yaxın tərəfdaşlarından biri sayılır.
Mövzu ilə bağlı Zefer.media–ya açıqlamasında Azərbaycan Mətbuat Şurasının İdarə Heyətinin üzvü, “Bakı Xəbər” qəzetinin baş redaktoru, siyasi şərhçi Aydın Quliyev bildirib ki, Trampın Polşaya hərbi dəstəyinin gücləndirilməsi təsadüfi deyil:
“Beş min əlavə hərbi qüvvənin yerləşdirilməsi barədə qərar ciddi strateji təhlükəsizlik və taktiki hərbi məsələlərlə bağlıdır. Polşa Şərqi Avropada, Rusiya ilə NATO-nun şərq cinahı arasında yerləşən ən strateji əhəmiyyətli ölkələrdən biridir. Eyni zamanda bu ölkə Ukraynanın müdafiəsi və təminatı baxımından da əlverişli coğrafi mövqeyə malikdir. Polşa Avropa ölkələri arasında Rusiya ilə daha sərt və barışmaz siyasət yürüdən az sayda dövlətdən biridir və bu mövqe həm də tarixi ədavət və siyasi faktorlarla bağlıdır. Bu baxımdan Polşa ABŞ-ın Şərqi Avropadakı ən ardıcıl və xüsusi strateji müttəfiqlərindən biri hesab olunur”.
Həmçinin siyası şərhçi qeyd edib ki, qərar Polşanın mövqeyini və təhlükəsizlik təminatını gücləndirməklə yanaşı, ABŞ-Rusiya münasibətlərində də etimadsızlıq mühitini daha da dərinləşdirə bilər:
“Rusiya bunu öz sərhədlərinə yaxın ərazilərdə ABŞ-ın hərbi-strateji mövqelərini gücləndirməsi kimi qiymətləndirəcək. Eyni zamanda bu addım NATO-nun Şərqi Avropadakı mövqelərini daha da möhkəmləndirir. Trampın NATO ilə müəyyən məsafə saxlamaq cəhdlərinə baxmayaraq, alyansın şərq cinahı ABŞ üçün xüsusi əhəmiyyət daşıyır. Buna görə də bu qərar həm Rusiyaya mesaj, həm NATO-nun gücləndirilməsi istiqamətində addım, həm də alyans daxilində bəzi ölkələrə siyasi siqnal kimi qiymətləndirilə bilər”.
Qəmər Kazımzadə
