ABŞ İranın Natanzdakı nüvə obyektinə zərbə endirməyə hazırlaşır.
Bunu ABŞ Prezidenti Donald Tramp jurnalistlərə açıqlamasında deyib.
“Biz bunu edəcəyik. Kirk dağını məhv edəcəyik. İranlılara deyin, hazırlaşsınlar”, – deyə o bildirib.
Trampın səsləndirdiyi həmin bəyanat Yaxın Şərqdə gərginliyin daha da arta biləcəyi ilə bağlı narahatlıqları gücləndirib.
Politoloq Əli Mustafa isə Zefer.media-ya açıqlamasında diqqətə çatdırıb ki, Trampın bu açıqlamalarının arxasında fərqli məqsədlər dayana bilər:
“Trampın bəzi açıqlamaları birbaşa deyil, dolayı yolla hansısa məqsədlərə xidmət edə bilər. Yəni bu bəyanatların gerçəkləşməməsi də mümkündür. Çünki bu addım qarşı tərəfi hədələmək, qorxutmaq niyyəti daşıya bilər və yaxud da birjalarda hansısa hərəkətliliyi tətikləmək məqsədi güdə bilər. Hələlik bu açıqlamalar gerçəkləşməyib, amma gerçəkləşə də bilər. Artıq Amerika İran ərazisindəki hərbi obyektləri vurur. Tramp rəsmi şəkildə atəşkəsin bitdiyini bəyan edib və İran da buna cavab verir. İndi nüvə obyektlərinin vurulmasının Amerikaya nə qazandıracağını, İrandan isə nələri alacağını dəqiq demək çətindir. Çünki biz həmin nüvə obyektlərində hansı işlərin aparıldığını və burada Trampın konkret niyyətinin nədən ibarət olduğunu tam bilmirik. Amma bütün hallarda, bu gedişat İranın mövqeyinin getdikcə zəifləməsinə, xüsusilə də onun nüvə potensialına hədəflənən bazaların sıradan çıxarılmasına səbəb olur. Hər bir halda, bu, İranın gücünü azaldan amildir”.
Ekspertin sözlərinə görə, ABŞ-nin mümkün hücumu İranın cavab addımlarına və bölgədə gərginliyin yenidən artmasına səbəb ola bilər:
“Digər tərəfdən, İranın hava hücumundan müdafiə sistemləri çox da effektiv olmasa da, onun hələ də raketləri və dronları var. Yəni İranın müəyyən formada asimmetrik cavab vermək imkanları mövcuddur. Əlbəttə, Amerika hücum edəcəksə, İran da buna cavab verəcək. Bu isə bölgədə münaqişənin yenidən genişlənməsi və dərinləşməsi riski deməkdir.
Bu məsələdə digər dövlətlərin mövqeyinə gəldikdə isə, Amerika dünyanın elə böyük hərbi-siyasi gücüdür ki, bu gün böyük dövlətlərdən heç biri ona qarşı açıq formada etiraz edə və ya qarşısında dura bilmir. Amma təbii ki, dövlətlər və beynəlxalq təşkilatlar bu savaşın, bu toqquşmanın dayanması üçün çağırışlar edirlər. Bununla belə, real bir gerçəklik də var ki, Amerika nə bahasına olursa-olsun, İranın nüvə obyektlərini sıradan çıxarmağa və onun nüvə dövlətinə çevrilməsinə mane olmağa çalışır. Odur ki, bu məsələyə digər dövlətlərin hansısa açıq və ciddi şəkildə müdaxilə edəcəyini ehtimal etmirəm. Lakin bütün hallarda, bu vəziyyət bölgədə savaş və gərginliyin davam etməsinə gətirib çıxaracaq”.
Lalə Qurbanlı
