Bakının Qaradağ rayonunda yerləşən “Sədərək” Ticarət Mərkəzində tez-tez yanğın hadisəsinin baş verməsi ilə əlaqədar xəbərlər eşidirik. Ötən günlərdə də yenə “Sədərək”də qapalı korpuslardan birində yüksək gərginlikli elektrik xətlərində qəfil partlayışlar baş verib.
Belə xoşagəlməz hadisələrin mütəmadi yaşanması bir çox suallara gətirib çıxarır. Yanğınların əsas səbəbi nədir? Həmin problem zaman-zaman olur, niyə doğru qaydada həll edilmir? və s.
Təhlükəsizlik eksperti Samir Nəbiyev Zefer.media-ya açıqlamasında vurğulayıb ki, ümumiyyətlə, “Sədərək” Ticarət Mərkəzi, 8-ci kilometr(Bakı şəhərinin Nizami rayonunda yerləşən məşhur yaşayış massivi) və digər iri ticarət bazarlarında yanğınların çox baş verməsinin səbəbləri müxtəlifdir:
“Bunlara daxildir: Köhnə və normativlərə uyğun gəlməyən elektrik şəbəkələri, həddindən artıq yüklənmə, qeyri-qanuni elektrik xətləri(hər bir dükan özü üçün ayrı naqilləşmə həyata keçirir), keyfiyyətsiz uzadıcı və birləşdiricilər, habelə nasaz elektrik avadanlıqları və həmin ərazilərdə yüksək yanğın yükünün mövcudluğu.
Onun da qeyd edim ki, tekstil, plastik, məişət əşyaları, mebel, fərqli-fərqli materiallar, kimyəvi məhsullar və tez alışan maddələrin çoxluğu da mühüm səbəblərdənir. Ləvazimatların sıx və normadan çox yığılması, ticarət yerlərinin öz başına genişləndirilməsi, hansı ki təxliyə yolları məhsullarla tutulması amilləri yol verilən ciddi səhvlərdəndir. Sadalanan nüanslar yanğınsöndürən avtomobillərinin daxil olmasını çətinləşdirir. O cümlədən yanğın aşkarlama və söndürmə sistemlərinin yoxluğu, ya da işlək vəziyyətdə olmaması da yanğınların mənbəyidir. Hansı ki, avtomatik siqnalizasiya, sprinkler sistemləri quraşdırılmalı, yanğın kranları və s. kimi bütün zəruri avadanlıqlar təmin edilməlidir”.
Ekspert diqqətə çatdırıb ki, həmçinin insan amilini də nəzərdən qaçırmaq olmaz:
“Siqaret çəkmək üçün xüsusi yerlərin ayrılması ya da ayrılmaması nəticəsində də yaşanır. Bu həm yanğın təhlükəsizliyindən, həm də yanar siqaretin düzgün söndürülmədən kənara atılması nəticəsində baş verir. Habelə sabotaj halları da ola bilər. Sözügedən mənfi halların qarşısını almaq üçün təkrar edirəm yanğın aşkarlama sistemləri, davamlı nəzarət kameralarının izlənilməsi, müntəzəm qaydada ərazilərə baxış keçirilməsi vacibdir, əsasdır”.
Müsahibimiz sonda əlavə edib ki, iri ticarət obyektlərində yanğın təhlükəsizliyi yalnız hadisə baş verdikdən sonra gündəmə gəlməməlidir. Onun fikrincə, əsas məsələ qabaqlayıcı tədbirlərin vaxtında, sistemli və ciddi şəkildə həyata keçirilməsidir.
Zərintac Mayisqızı
