Zefer.media TRT Haber-ə istinadla xəbər verir ki, Ukrayna Prezidenti Volodimir Zelenskinin müharibənin indiyədək ən genişmiqyaslı hücumlarından biri kimi xarakterizə etdiyi ölkəboyu hücum zamanı paytaxtdakı əsas körpü keçidlərinə ballistik raketlər atılıb. Hücum nəticəsində azı 9 nəfər həlak olub.
Rusiya Prezidenti Vladimir Putin Kreml tərəfindən Rusiyanı işğal altındakı yarımada ilə birləşdirmək məqsədilə inşa edilən Krım körpüsünə hücuma cavab veriləcəyi ilə bağlı hədələyici açıqlama vermişdi.
Rusiyanın son zərbələri müharibə ilə bağlı intensiv diplomatik danışıqların aparıldığı vaxta təsadüf edib. Eyni zamanda, Kreml Rusiyanın Ukrayna üçün Qərbin dəstəklədiyi təhlükəsizlik zəmanətlərinə açıq ola biləcəyi ilə bağlı ABŞ-nin iddiasını rədd edib.
Zelenskinin sözlərinə görə, gecə saatlarında Ukraynaya qarşı həyata keçirilən hücum bir neçə şəhər və bölgəni əhatə edib. Yaşayış binaları və enerji infrastrukturu da zərbələrə məruz qalıb.
Hava hücumu xəbərdarlığı sirenləri bütün gecə fasiləsiz səslənib və səhər saatlarında da davam edib.
Zelenski bildirib ki, Rusiya 110-dan çox raket və 400-dən artıq hücum dronu buraxıb. O əlavə edib ki, hücum dalğalarının 20-30 dəqiqəlik fasilələrlə həyata keçirilməsi kimi “xüsusilə məkrli” taktika yanğınların söndürülməsini, dağıntıların təmizlənməsini və xidmətlərin bərpasını daha da çətinləşdirib.
Kiyevdə hədəfə alınan üç körpü – Podilsko-Voskresenski körpüsü, Darnitski körpüsü və Cənub körpüsü – nəqliyyatın hərəkəti üçün bağlanıb.
Kiyev meri Vitali Kliçko insanları “mütləq zərurət olmadığı təqdirdə şəxsi avtomobillərlə şəhərə gəlməməyə” çağırıb. Bu hadisə həftənin əvvəlində mühüm körpü keçidlərinə qarşı həyata keçirilən ilk hücum dalğasından sonra paytaxt ətrafında yaranmış nəqliyyat problemlərini daha da artırıb.
Kliçkonun sözlərinə görə, azı 7 nəfər həlak olub, daha 17 nəfər yaralanıb. Müəyyən edilməyən mülki obyektlərə də ziyan dəyib.
Ukraynanın bu həftənin əvvəlində Krım körpüsünün avtomobil yolu hissəsini sıradan çıxarmaq məqsədilə həyata keçirdiyi genişmiqyaslı əməliyyat Moskva üçün həm taktiki, həm də simvolik zərbə olub.
2014-cü ildə Krımı qanunsuz ilhaq etdikdən sonra Moskva yarımadada qoşunlar və hərbi texnika yerləşdirib. İşğalçı qüvvələr cəbhə xəttinə doğru hərəkət edərkən yarımadadan istifadə edirlər.
Ukrayna Prezidenti Volodimir Zelenski bildirib ki, körpünün müdafiəsini zəiflətmək və nəticədə onun bir hissəsinin çökməsinə səbəb olmaq məqsədi daşıyan əməliyyat üzərində həftələrlə işlənilib.
Körpünü 2019-cu ildə şəxsən açan və bu addımına görə beynəlxalq ictimaiyyətin sərt tənqidi ilə üzləşən Rusiya Prezidenti Vladimir Putin hücuma Kremlin verəcəyi cavabın “qat-qat daha ağrılı” olacağını bildirib.
İndiyədək təsdiqlənmiş 9 ölüm hadisəsindən 7-si Kiyevdə, 2-si isə Lvovda qeydə alınıb. Ən azı 28 nəfər yaralanıb.
Ukraynanın qərbində yerləşən Lvov şəhərindəki Sknıliv dəmiryol stansiyasına ciddi ziyan dəyib. Şəhər Ukraynaya gələn insanların və beynəlxalq humanitar yardımların əsas giriş məntəqələrindən birinə çevrilib. Bu barədə şəhərin meri Andriy Sadovı məlumat verib.
Hücum Böyük Britaniyanın Baş naziri Endi Börnham, Fransa Prezidenti Emmanuel Makron və Almaniya kansleri Fridrix Mertsin də daxil olduğu Avropa liderlərinin Ukraynada müharibəyə son qoymaq üçün Moskvanın da iştirak edəcəyi danışıqlara hazır olduqlarını bildirməsindən bir neçə saat sonra başlayıb.
Ukraynanın müttəfiqlərinin sülh razılaşması əldə olunacağı təqdirdə ölkəyə təhlükəsizlik dəstəyi göstərməyi öhdələrinə götürdükləri beynəlxalq ittifaq – “Könüllülər koalisiyası”nın Berlində keçirilən görüşündə Zelenski və ABŞ Prezidenti Donald Trampın nümayəndələri də iştirak ediblər.
Cared Kuşner ABŞ-nin “Avropanı öz yanında görərək razılaşma əldə etmək istədiyini” bildirib. Bu açıqlama Trampın həftənin əvvəlində Putinlə keçirdiyi təkbətək görüşdən sonra ABŞ və Rusiya arasında ayrıca razılaşma əldə edilə biləcəyi ilə bağlı narahatlıqların yenidən artdığı bir vaxta təsadüf edib.
Kuşner iddia edib ki, Rusiya Ukraynanın NATO Nizamnaməsinin 5-ci maddəsinə əsaslanan təhlükəsizlik zəmanətləri almasına “müsbət yanaşır”. Həmin maddəyə əsasən, alyans üzvləri hücuma məruz qalan üzv ölkənin müdafiəsinə kömək etməlidirlər.
Lakin bazar ertəsi Rusiyanın xarici işlər nazirinin müavini Sergey Ryabkov bu iddiaya qarşı çıxaraq Ukraynanın “kvazi-NATO” üzvlüyünün Rusiya üçün “qəbuledilməz” olduğunu bildirib. Kreml uzun müddətdir Ukraynanın NATO-ya üzv olmaq perspektivini müharibəyə başlamasının əsas səbəblərindən biri kimi göstərir.
ABŞ Prezidenti Çindən qayıdarkən “Air Force One” təyyarəsinin göyərtəsindən Berlin danışıqlarına telefonla qoşulub. O, Çində rusiyalı həmkarı və Çin lideri Si Cinpinlə görüşmüşdü.
Məlumatlara görə, Tramp Avropa liderlərinin Ukraynaya hərbi maliyyələşdirmə üçün 70 milyard avro (58,6 milyard funt sterlinq; 76 milyard dollar) ayırmaq öhdəliyini şübhə altına alıb.
Böyük Britaniya və Fransa “Könüllülər koalisiyası” tərəfindən təşkil edilən ilk hərbi təlimlərə birgə rəhbərlik edirlər. Polşada keçirilən təlimlərdə 11 ölkədən minlərlə hərbçi iştirak edir.
Cümə günü Polşanın Baş naziri Donald Tusk Rusiya qanadlı raketinin ölkə ərazisinə düşməsindən sonra Moskvanı “qəsdən təxribat törətməkdə” ittiham edib.
Polşanın müdafiə naziri Vladislav Kosinyak-Kamışın cümə günü verdiyi məlumata görə, raket Ukrayna ilə sərhəddən təxminən 50 kilometr (31 mil) məsafədə yerə düşüb.
Nazir əlavə edib ki, yaxınlıqdakı kəndlərə daha iki naməlum uçuş obyekti düşüb. Onlardan birinin dron, digərinin isə raket olduğu ehtimal edilir. Hadisə nəticəsində xəsarət alan olmayıb.
Rusiyanın Ukraynanın qərbinə hücumları davam edərkən Polşa və İsveç qırıcı təyyarələri NATO-nun şərq cinahında havaya qaldırılıb. Lakin sonradan onların döyüş hazırlığı vəziyyətindən çıxarıldığı bildirilib.
Fransanın Xarici İşlər naziri Jan-Noel Barro Rusiyanın Kiyevə hücumundan sonra BMT Təhlükəsizlik Şurasının iclasının keçirilməsini tələb edib.
O, Avstriya və Niderland səfirliklərinə də ziyan dəydiyi bildirilən zərbələri “cinayət” adlandırıb və “Rusiyanın buna görə cavab verməli olacağını” vurğulayıb.
Lalə Qurbanlı




