Azərbaycan və Türkiyə arasında sarsılmaz qardaşlıq bağları 2023-cü il 6 fevral baş verən zəlzələnin ağır nəticələrinin aradan qaldırılması prosesində bir daha öz təsdiqini tapıb. Bu gün həmin faciədən 3 il keçir. Fəlakətin ilk anlarından etibarən bütün imkanlarını səfərbər edən Azərbaycan, həm dövlət, həm də xalq səviyyəsində göstərdiyi dəstəklə “bir millət, iki dövlət” fəlsəfəsinin sadəcə sözdə deyil, əməldə də dəyişməz olduğunu sübut edib. Hazırda iki ölkənin müvafiq qurumları gələcək fəlakətlərin qarşısının alınması və böhranların idarə edilməsi sahəsində ortaq təcrübə mübadiləsini uğurla davam etdirir.
Millət vəkili Tənzilə Rüstəmxanlı Zefer.media-ya verdiyi açıqlamada Türkiyədə baş vermiş zəlzələ fəlakətinin ağır nəticələrinə və xalqımızın nümayiş etdirdiyi böyük həmrəyliyə diqqət çəkib:
“2023-cü il fevralın 6-da qardaş Türkiyədə baş vermiş zəlzələ fəlakəti, miqyasına və nəticələrinə görə olduqca ağır bir faciə idi. Həmin bölgəyə səfər edərkən dağıntıların dəhşətli mənzərəsini öz gözlərimizlə gördük: böyük binalar, bütöv küçələr tamamilə yerlə-yeksan olmuşdu. Baş vermiş insan itkilərinin acısı isə təsviredilməzdir”.
Müsahibimiz, baş vermiş zəlzələ zamanı Azərbaycan və Türkiyənin sarsılmaz dostluq və qardaşlıq bağlarını bir daha bütün dünyaya nümayiş etdirdiyini xüsusi vurğulayıb:
“Bu ağır sınaq anında Türkiyənin səsinə ilk səs verən məhz Azərbaycan oldu. Azərbaycan Fövqəladə Hallar Nazirliyinin heyəti dərhal hadisə yerinə yollandı. Azərbaycan xalqı yeddidən yetmişə qədər bir yumruq kimi birləşərək bu kədəri öz acısı kimi yaşadı. Biz eyni kökə sahib, bir millətik; tariximiz, taleyimiz və faciələrimiz hər zaman bir olub. Biz bir-birimiz üçün şəhidlər vermiş, fərqli coğrafiyalarda yaşasaq da, ruhən ayrılmaz olan vahid xalqın övladlarıyıq. Türk dünyasında Azərbaycan və Türkiyə qədər bir-birinə yaxın və strateji müttəfiq olan ikinci bir nümunə yoxdur. Arzu edirəm ki, gələcəkdə Azərbaycanın bütün türk dövlətləri ilə münasibətləri bu yüksək səviyyəyə çatsın”.
Sonda T. Rüstəmxanlı vurğulayıb ki, Azərbaycan xalqının nümayiş etdirdiyi bu səmimi həmrəylik və yardım üçün səfərbər olması Türkiyədə həm dövlət, həm də xalq səviyyəsində böyük minnətdarlıqla qarşılanır. O, bu sarsılmaz birliyin təməlində dərin tarixi bağlarımızın və sarsılmaz mənəvi birliyimizin dayandığını xüsusi qeyd edib.
Pərvin
