Rusiya Prezidenti Vladimir Putin faşizm üzərində Qələbə günü münasibətilə keçirilən tədbirlərdən sonra Kremldə ayaqüstü mətbuat konfransında Ukraynaya qarşı müharibə və Yaxın Şərqdəki gərginlikdən danışarkən Ermənistanın baş naziri Nikol Paşinyana da xəbərdarlıq mesajı göndərməyi unutmayıb. Kreml sahibi Paşinyanla son görüşündə ona söylədiyini bir daha təkrarlayıb: “Ermənistan Avrasiya İqtisadi İttifaqında üzvlüklə Avropa İttifaqına inteqrasiya kursu arasında seçim etməlidir”.
Zefer.media xəbər verir ki, bu barədə politoloq Elxan Şahinoğlu deyib.
“Ancaq Vladimir Putin bu dəfə mövzuyla bağlı iki əlavəsini də edib. Birincisi, Rusiya Prezidentinin sözlərinə görə, İrəvan Avropa istiqamətini seçəcəyi təqdirdə Rusiya ilə “yumşaq və mədəni ayrılıq” baş verəcək. İkincisi, Putin Paşinyana Ermənistanın Avropa inteqrasiyası məsələsiylə bağlı referendum keçirməyi təklif edib”.
Politoloq qeyd edib ki, Putin bunları deyərkən, erməni cəmiyyətinə də mesaj göndərib:
“Ermənistan Avrasiya İiqtisadi İttifaqında ciddi üstünlüklər əldə edib”. Yəni Putin erməni cəmiyyətini xəbərdar edib ki, Paşinyan referendum keçirərsə və ermənilər Avropa İttifaqına inteqrasiya kursuna üstünlük verərlərsə, itirəcəkləri olacaq. Putin bunu açıq deməsə də, Rusiyanın Ermənistana satdığı qazın qiymətini qaldıracağını da nəzərdə tutub.
Nikol Paşinyan parlament seçkilərində qələbə qazanarsa, ilk növbədə Konstitusyanı dəyişdirib Azərbaycanla sülh sazişi imzalamaq və Türkiyə ilə sərhədin açılmasını və bu ölkə ilə ticarətin başlamasını təmin etməyə çalışacaq. Bununla paralel olaraq “Tramp yolu”nun tikintisinə başlanacaq. Əlbəttə, Nikol Paşinyan Rusiyanın yerinə Avropa İttifaqı ilə inteqrasiyanı seçmək istəyər, ancaq reallıq budur ki, İrəvan istəsə belə Ermənistan qısa zaman kəsiyində Avropa İttifaqının üzvü olmayacaq. Bunu Paşinyan da anlayır, Putin də. Ona görə də, Putin “seçim et” tələbiylə Paşinyanı güncə sıxmağa və bu yolla Ermənistandakı radikal müxalifətin əlini gücləndirməyə çalışır”.
Qeyd edək ki, 9 may 2026-cı il tarixində Rusiyanın paytaxtı Moskvada, Qırmızı meydanda Böyük Vətən Müharibəsində (İkinci Dünya Müharibəsi) qələbənin 81-ci ildönümü münasibətilə ənənəvi hərbi parad keçirilib. Parad son 20 ildə ilk dəfə olaraq ağır hərbi texnika nümayiş olunmadan, yalnız piyada kolonları və aviasiya hissəsi ilə baş tutub.
Zərintac Mayisqızı
