İran prezidenti Məsud Pezeşkian ABŞ ilə müharibənin davam etdirilməsinin tərəfdarı olmadığını, ancaq qarşıdakı təzyiqlər fonunda ölkənin dayanıqlılığının gücləndirilməsinin vacibliyini bildirib.
Zefer.media xəbər verir ki, Pezeşkian bunu aparıcı universitetlərin rəhbərləri ilə görüşündə deyib.
Onun sözlərinə görə, qarşıda İranı yeni hadisələr gözləyir və ölkə həmin proseslərə daha hazırlıqlı olmalıdır.
İran prezidenti iqtisadi tədbirlərin də cəmiyyətdəki mövcud vəziyyət nəzərə alınmaqla həyata keçirilməli olduğunu vurğulayıb.
Dövlət başçısı keçmiş seçki rəqiblərinin hazırda hökumətlə əməkdaşlıq etdiyini də deyib. O, keçmiş prezidentliyə namizəd Səid Cəlilidən problemlərin həllinə kömək etməsini xahiş etdiyini və zərurət yaranacağı təqdirdə səlahiyyətlərini başqalarına həvalə etməyə hazır olduğunu qeyd edib.
Zərintac Mayisqızı
