Rusiya Ukrayna ərazisində Aİ və NATO hərbi kontingentlərinin yerləşdirilməsi planlarını tamamilə qəbuledilməz hesab edir və buna imkan verməyəcək.
Zefer.media xəbər verir ki, bunu Rusiya prezidentinin mətbuat katibi Dmitri Peskov deyib.
Peskovun sözlərinə görə, xüsusi hərbi əməliyyatın məqsədlərindən biri NATO qoşunlarının Ukrayna ərazisində olmasının qarşısını almaqdır.
Kremlin sözçüsü həmçinin deyib: “Rusiya hərbi qüvvələri Kiyevə silah və sursat çatdıran gəmilərə zərbələr endirməyə davam edəcək. Rusiya Silahlı Qüvvələrinin bütün hərəkətləri, o cümlədən beynəlxalq sularda son döyüş atışlı təlimləri beynəlxalq dəniz qanunlarına ciddi şəkildə uyğun olaraq həyata keçirilir”.
Böyük Britaniyada hökumət dəyişikliyinə münasibət bildirən Peskov vurğulayıb ki, Kreml Endi Börnemin Baş nazir vəzifəsinə başlamasından sonra Londonla münasibətlərin yaxşılaşacağını gözləmir.
Onun sözlərinə görə, yeni Böyük Britaniya baş nazirinin Ukraynaya qeyd-şərtsiz dəstək verdiyi barədə ilkin açıqlamaları mövcud kursu davam etdirmək niyyətini göstərir.
Peskov Moskvanın Böyük Britaniya ilə münasibətlərin yaxşılaşacağını gözləyib-gözləmədiyi ilə bağlı suala cavab olaraq “Bizim belə bir ümidimiz yoxdur” deyib.
O, həmçinin ifadə edib ki, Rusiya prezidenti Vladimir Putinlə Britaniyanın yeni baş naziri arasında əlaqələrin təşkili ilə bağlı hələlik heç bir plan yoxdur.
Bundan əlavə, Kremlin sözçüsü FTB direktoru Keş Patelin Rusiyaya mümkün səfəri barədə heç bir məlumata malik olmadığını qeyd edib. O söyləyib ki, bu cür səfərlər adətən qapalı qapılar arxasında keçirilir.
Xatırladaq ki, “Politico” əvvəllər ABŞ rəsmilərinə istinadən FTB direktorunun oktyabrın ortalarında Rusiyaya səfər edə biləcəyini vurğulamışdı.
Zərintac Mayisqızı
