Ermənistan Ukrayna məsələsində Rusiyanın müttəfiqi deyil.
Zefer.media xəbər verir ki, bunu Ermənistanın Baş naziri Nikol Paşinyan deyib.
“Mən 2022 və ya 2023-cü illərdə bildirmişdim ki, biz Ukrayna məsələsində Rusiyanın müttəfiqi deyilik”, – deyə Paşinyan Zelenskinin Avropa Siyasi Birliyi sammiti üçün İrəvana səfərinin nəticələri ilə bağlı suala cavab verərkən ifadə edib.
Baş nazir əlavə edib ki, Ermənistan əvvəllər Ukraynaya humanitar yardım göndərib.
O, həmçinin 1991-ci il tarixli məşhur Alma-Ata Bəyannaməsinə diqqət çəkərək söyləyib: “Bu, Ermənistan tərəfi üçün çox vacib sənəddir. Bəyannamədə İttifaqın dağılması zamanı keçmiş Sovet respublikalarının sərhədləri müəyyən edilib”.
Paşinyan vurğulayıb ki, İrəvan məhz həmin bəyannaməyə istinadən 2022-ci ilin oktyabr ayında qəbul olunmuş Praqa Bəyannaməsində Qarabağı Azərbaycanın bir hissəsi olduğunu etiraf edib.
Məlumat üçün qeyd edək ki, Rusiya Xarici İşlər Nazirliyi Ermənistana sərt mesaj göndərib. Nazirlik bildirib ki, “qardaş ölkə” hesab etdikləri Ermənistan Ukrayna rejiminin lideri Volodimir Zelenski üçün platformaya çevrilib. Rusiya XİN vurğulayıb ki, bu addım Moskva tərəfindən unudulmayacaq.
Zərintac Mayisqızı
