Rusiya Prezidenti Vladimir Putin Qələbə Günündə Moskvaya gələn xarici liderlərin şəxsi cəsarət göstərdiyini deyib. O, Ermənistanın Baş naziri Nikol Paşinyanın Qələbə Günündə Moskvaya gəlməkdən imtina etməsində xüsusi bir şey görmədiyini də qeyd edib.
Mövzuya münasibət bildirən politoloq Həşim Səhrablı Zefer.media-ya açıqlamasında bildirib ki, Ermənistan 2018-ci ildən sonra xarici siyasətdə Qərbə yaxın xəttə üstünlük verməyə başlayıb:
“Ermənistan rəsmilərinin Rusiyaya qarşı tutumu və Paşinyanın anti-Rusiya addımları dövlətlərarası münasibətlərdəki gərginlikdən xəbər verir. Çünki inqilabdan sonra Ermənistan dövləti sadəcə rejim və ya şəxs dəyişikliyinə getməyib, həm də xarici siyasət istiqamətlərini tamamilə dəyişib. Rusiya ilə əlaqələr kəsilməsə də, qərbə meylliliyin prioritet seçilməsi münasibətləri gərgin situasiyaya gətirib çıxarıb. Paşinyanın paradda iştirak etməməsini də məhz 2018-ci ildən bəri davam edən addımların silsilə davamı kimi qəbul etməliyik”.
Politoloq vurğulayıb ki, Paşinyan əsas prioritetinin Rusiya deyil, Qərblə münasibətləri inkişaf etdirmək olduğunu göstərməyə çalışır:
“Paşinyanın həmin qərarı özünü qərb dairələrinə daha sevimli və faydalı göstərmək niyyətindən doğa bilər. Çünki paradda iştirak etmək Rusiya ilə əlaqələrə önəm vermək mesajı sayıla bilərdi. İndiki vəziyyətdə bunu etmək həm seçki ərəfəsində qərbmeylli kütlənin dəstəyinin azalmasına səbəb olar, həm də Qərb dairələrinin Paşinyana dəstək məsələsini sorğulamasına yol açardı. Paşinyan bu addımı ilə öz tutumunu ortaya qoyaraq Rusiya ilə əlaqələrin onun üçün prioritet olmadığını, başlıca hədəfinin Qərblə münasibətləri inkişaf etdirmək olduğunu göstərib.
İrəvanın Qərblə yaxınlaşması Moskva ilə münasibətlərinə birmənalı şəkildə zərbə endirir. Hazırda Rusiya öz xarici siyasətində Qərbin əsas dövlətlərini düşmən elan etmiş vəziyyətdədir. Bu baxımdan, Paşinyanın Rusiyanın düşmənləri ilə əlaqələrini inkişaf etdirməsi xoş qarşılanmır və biz Rusiya tərəfindən Ermənistana qarşı sərt tutumun sərgiləndiyini görməkdəyik. Yaxın gələcəkdə İrəvan qərbyönümlü siyasətini davam etdirəcək, böyük ehtimalla Paşinyan seçkilərdə qalib gələcək, Moskva isə qərbə yönələn Ermənistan reallığını qəbul etməyərək ona qarşı addımlar atmağa davam edəcək”.
Lalə Qurbanlı
