Azərbaycan ədəbiyyatının görkəmli nümayəndələri – şair Mikayıl Müşfiq və dramaturq Cəfər Cabbarlının ev muzeyləri təmir olunacaq.
Zefer.media Mədəniyyət Nazirliyindən bildirilib ki, qurum tərəfindən muzeylərin cari və əsaslı təmiri, ekspozisiyalarının bədii tərtibatı, maddi texniki bazasının gücləndirilməsi istiqamətində mütəmadi olaraq işlər həyata keçirilir.
Mikayıl Müşfiqin ailə üzvləri, yaxınları da açıqlama verərək sevincini bölüşüblər. Dəyərli şairin nəsil davamçısı, əmisi nəvəsi Reyhan İsmayılzadə vurğulayıb ki, bu xəbər onun və bütün Müşfiqsevərlər üçün olduqca sevindirici hadisədir:
“Mikayıl Müşfiq nəslinin – İsmayılzadələrin davamçısı olaraq muzeyin layihələndirilməsi və təmir-bərpa işlərində öz dəstəyimizi göstərməyə hər zaman hazıram.
Mədəniyyət nazirimiz cənab Adil Kərimli ilə görüşümüz zamanı o, muzeyin layihələndirilməsi və təmir-bərpa prosesi çərçivəsində yaradılacaq işçi qrupuna məni də daxil edəcəyinə söz vermişdi. Bu, mənim üçün böyük etimad və məsuliyyətdir.
Reyhan İsmayılzadə onu da qeyd edib ki, muzeyin rəhbərliyinə ailə üzvlərimizdən birinin təyin olunması məqsədəuyğun olardı:
“Şairin irsinin, İsmayılzadələr nəslinin təbliği və qorunması işində mütləq şəkildə onun birbaşa nəsil davamçılarından biri iştirak etməlidir. Düşünürəm ki, şairin həyat və yaradıcılığının təbliğini daha dolğun, daha dəqiq və məsuliyyətlə həyata keçirə bilərik.
Bu xəbərlə mənim ən böyük arzularımdan birinin gerçəkləşdi. Bu gün valideynlərimin, M.Müşfiqin bacısı Balacaxanım bibimin, eləcə də Dilbər Axundzadənin ruhunun şad olduğuna inanıram. Çünki onlar ömürlərini Müşfiq irsinin yaşadılmasına həsr etmiş, bu müqəddəs amal uğrunda böyük zəhmətlər çəkmişlər.
Müraciətlərimizi diqqətlə qarşılayan və ailəmizə hər zaman xüsusi qayğı göstərən, başda cənab Prezident, Ali Baş Komandan İlham Əliyev olmaqla, Birinci vitse-prezident, xanımlar xanımı, hörmətli Mehriban Əliyevaya, həmçinin Mədəniyyət nazirimiz cənab Adil Kərimliyə dərin minnətdarlığımı bildirirəm. Bu prosesdə bizə dəstək olan bütün Müşfiqsevərlərə də səmimi təşəkkürümü çatdırıram.
İnanıram ki, ölkə rəhbərliyinin diqqət və qayğısı bundan sonra da Şairin nəslinin davamçılarına artacaq və bu irsin yaşadılması istiqamətində görülən işlər daha da genişlənəcəkdir.
Allah ömür versə, muzeyin təmirdən sonrakı açılış mərasimində iştirak etməyi arzulayıram.
Bu gün Mikayıl Müşfiqin nakam ruhunun şad olduğuna inanıram və əminəm ki, muzey əsaslı təmirdən sonra qapılarını yenidən açdıqda bu onun ruhu daha da şad olacaq”.
Zərintac Mayisqızı
