Yaz gözəlliyi ilə göz oxşayan, ətrafın rəngbərəng olduğu bir fəsldir. Gəlişi ilə təbiəti cana gətirir, demək olar hər şey yenilənir. Lakin özümüzə diqqət etməsək səhhətimizdə problemlər yaranar və danışdığımız bu müsbət məqamları doyunca yaşaya bilmərik. Sizə yaz depressiyası ilə bağlı məlumat verdik. İndi isə bu mövsümdə əmələ gələn allergik xəstəliklərdən söz açacağıq.
Həkim-terapevt Günay Musayeva Zefer.media–ya açıqlamasında deyib ki, sözügedən fəsil allergik xəstəliklərin ən çox aktivləşdiyi dövrlərdən biridir:
“Bu xüsusilə allergik rinit, bronxial astma və bəzi dəri allergiyalarında daha qabarıq şəkildə müşahidə olunur. Bunun əsas səbəbi allergenlərin kəskin artması ilə bağlıdır. Yaz aylarında ağacların, otların və digər bitkilərin çiçəklənmə dövrü başlayır. Bu zaman havaya böyük miqdarda polen yayılır. Polenlər çox yüngül olduqları üçün küləklə asanlıqla yayılır və insan orqanizminə daxil olur. Allergiyaya meyilli şəxslərdə bu, immun sisteminin həddindən artıq reaksiyasına səbəb olur və həddindən artıq nəticədə burun tutulması, asqırma, gözlərdə qaşınma və yaşarma, bəzən də nəfəs darlığı kimi əlamətlər ortaya çıxır. Digər mühüm faktor iqlim dəyişikliyi ilə əlaqədardır. Yazda temperaturun dəyişkənliyi, rütubətin artması və küləkli hava şəraiti allergenlərin yayılmasını sürətləndirir. Eyni zamanda qışdan sonra orqanizmin immunitet sisteminin adaptasiya mərhələsində olması da allergik reaksiyaların daha rahat baş verməsinə şərait yaradır”.
Həkim bildirib ki, şəhər mühitində hava çirkliliyi, avtomobil qazları və toz hissəcikləri polenlə birləşərək alergik təsiri daha da gücləndirir:
“Bu qarışıq selikli qişaları qıcıqlandıraraq simptomların ağır keçməsi ilə nəticələnə bilər. Polen mövsümündə xüsusilə səhər saatlarında, küləkli, açıq havada uzun müddət qalmaqdan çəkinmək lazımdır. Evə qayıtdıqdan sonra üz və əllərin yuyulması, saçların təmizlənməsi, çöl paltarının dəyişdirilməsi, pəncərələri polenin yüksək olduğu saatlarda bağlı saxlamaq, mütəmadi təmizlik işləri aparmaq, toz yığılmasının qarşısını almaq və həkim məsləhəti ilə bəzi preparatların, burun spreylərinin profilaktik istifadəsi, allergiyası olan şəxslərin allergenləri alerqoloji testlərlə əvvəlcədən müəyyən etməsi, həmçinin ehtiyac olduqda maskadan istifadə əsasən küləkdə və s. kimi amillər diqqətdə saxlanılmalıdır”.
Zərintac Mayisqızı
