“BDU könüllüləri” təşkilatının Jurnalistika fakültəsi üzrə könüllülərinin təşkilatçılığı ilə “MediaPulse” təcrübə proqramının növbəti görüşü baş tutub. Görüşün qonağı AzTV-nin sədr müavini, televiziya aparıcısı, diktor, rejissor, Azərbaycan Respublikasının əməkdar artisti Rafiq Həşimov olub.
Zefer.media xəbər verir ki, tədbiri giriş sözü ilə Jurnalistika fakültəsinin dekan müavini Samir Mirzəyev açıb. O, çıxışı zamanı Rafiq Həşimovun televiziya və media sahəsindəki uzunmüddətli peşəkar fəaliyyəti, Azərbaycan televiziyasına verdiyi töhfələr və gənc jurnalistlər üçün örnək olan yaradıcılıq yolundan bəhs edib.
Rəsmi hissədən sonra tədbir interaktiv müzakirə formatında davam edib. Rafiq Həşimov tələbələrlə televiziya və media sahəsindəki peşəkar təcrübəsini bölüşüb, diktor sənətinin incəlikləri, efir mədəniyyəti və bu sahədə uğur qazanmağın vacib məqamları barədə fikirlərini iştirakçılarla paylaşıb.
Görüş zamanı tələbələri maraqlandıran suallar cavablandırılıb, media sahəsində inkişaf etmək istəyən gənclərə tövsiyələr verilib. Həmçinin tədbir çərçivəsində Rafiq Həşimov öz film çəkilişlərindən nümunələr təqdim edərək tələbələrə çəkiliş prosesi və rejissorluq fəaliyyəti barədə məlumat verib.
Sonda qonaq tələbələrə gələcək fəaliyyətlərində uğurlar arzulayıb və nəzəri biliklə yanaşı praktiki təcrübənin vacibliyini xüsusi olaraq vurğulayıb.
