Rusiya xarici işlər naziri Sergey Lavrov Şərq İqtisadi Forumunda (ŞİF) Ermənistanın Avropa İttifaqına (Aİ) üzv olmaq istəyinin “çox tezliklə” yox olacağını bildirib. Bu barədə TASS məlumat yayıb.
Zefer.media xarici mətbuata istinadən xəbər verir ki, nazirin sözlərinə görə, Avropa İttifaqı iqtisadi üstünlüklərini itirir, lakin bəzi ölkələr hələ də quruma üzv olmağa can atırlar.
“İqtisadi baxımdan Avropa İttifaqı, bir çox amillər, o cümlədən uzaqgörən olmayan siyasəti — axmaqlıq deməmək üçün belə deyək — səbəbindən öz üstünlüklərini itirir”, — Lavrov deyib.
O qeyd edib ki, Ermənistanda və Serbiyada Aİ-yə qoşulmaq istəyindən danışmaqda davam edirlər.
“Bizim serbiyalı dostlarımız, elə buradakı erməni həmkarlarımız da deyirlər: biz Avropa İttifaqına üzv olmaq istəyirik. Əminəm ki, onların bu istəyinə çox tezliklə son qoyulacaq”, — Rusiya XİN rəhbəri bildirib.
Xatırladaq ki, 2025-ci ilin martında Ermənistan parlamenti ölkənin Avropa İttifaqına üzvlük prosesinin başlanması haqqında qanun qəbul edib. 2026-cı ilin avqustunun sonunda Ermənistanın baş naziri Nikol Paşinyan İrəvanın yaxın vaxtlarda Aİ-yə üzvlük üçün rəsmi müraciət təqdim etmək niyyətində olduğunu açıqlayıb.
Sentyabrın 1-də Rusiya Prezidenti Vladimir Putin Paşinyanla görüşündə Ermənistanın eyni vaxtda həm Aİ, həm də Avrasiya İqtisadi İttifaqının (Aİİ) üzvü olmasının mümkün olmadığını bildirib. Onun sözlərinə görə, Aİ-yə üzvlük prosedurunun başlanması faktiki olaraq Ermənistanın Aİİ-dən çıxmaq niyyətini bəyan etməsi demək olacaq.
Putin iki birlikdən birinin seçilməsi ilə bağlı referendum keçirilməsini təklif edib. Lakin Paşinyan bildirib ki, Ermənistan avrointeqrasiya haqqında qanunun qəbulundan sonra bu ideyadan faktiki olaraq imtina edib. Baş nazir daha əvvəl də İrəvanda Ermənistanın eyni vaxtda həm Aİ, həm də Aİİ-yə üzv olmasının mümkün olmadığının başa düşüldüyünü təsdiqləyib.
Pərvin Hacıyeva
