Kreml Qazaxıstan Prezidenti Kasım-Jomart Tokayevin BMT Baş katibi vəzifəsinə mümkün namizədliyi ilə bağlı heç bir məsləhətləşmədə iştirak etməyib.
Zefer.media xəbər verir ki, Rusiya Prezidentinin mətbuat katibi Dmitri Peskov brifinqdə bu məsələ ilə bağlı sualı cavablandırıb.
“Xeyr, belə məsləhətləşmələr olmayıb”, – o vurğulayıb.
Peskov qeyd edib ki, hazırda bir çox ölkə namizədlik prosesi ilə bağlı intensiv məsləhətləşmələr aparır.
Sözçü əlavə edib ki, Rusiya bir çox potensial namizədi tanıyır və AEBA-nın baş direktoru Rafael Qrossi haqqında müsbət rəyə malikdir. “Cənab Qrossi haqqında çox yaxşı rəyimiz var. AEBA çərçivəsində məsələlər ilə bağlı daim əlaqə saxlayırıq”, – deyə Peskov qeyd edib.
Peskov onu da bildirib ki, namizədlərlə bağlı məsləhətləşmələr asan olmayacaq: “Hazırda hər kəs çox mürəkkəb məsləhətləşmələrə qatılacaq və əlbəttə ki, biz də onlarda iştirak edəcəyik”.
BMT Baş katibi vəzifəsinə namizədlər üçün ictimai dinləmələr 2026-cı il aprelin 21-də başlayacaq və seçkilər iyul ayında keçiriləcək. Hazırkı Baş katib Antonio Quterreşin səlahiyyət müddəti 2026-cı il dekabrın 31-də başa çatır.
Zərintac Mayisqızı
