Azərbaycan Silahlı Qüvvələrinin Xüsusi Təyinatlı Qüvvələrinin kəşfiyyat tabor komandiri, Aprel döyüşlərinin qəhrəmanı və şəhidi Mühüd Qurban oğlu Orucovun doğum günüdür.
Zefer.media xəbər verir ki, “Kəşfiyyatın Mixaylosu” kimi tanınmış kapitan Orucov 1984-cü il iyulun 13-də Qazax rayonunun Fərəhli kəndində anadan olub.
O, Cəmşid Naxçıvanski adına Hərbi Liseyi (1999-2002) və Heydər Əliyev adına Azərbaycan Ali Hərbi Məktəbini (2002-2006) bitirib. Türkiyədə xüsusi təyinatlı, paraşüt və komando kurslarında təlim keçib.
Şəhidimiz Xüsusi Təyinatlı Qüvvələrdə kəşfiyyat qrup komandirindən tabor komandirinə qədər yüksəlib. Dəfələrlə düşmən arxasına sızaraq əməliyyatlar həyata keçirib, 2014-cü ilin avqust döyüşlərindəki şücaətinə görə Ali Baş Komandan tərəfindən mükafatlandırılıb.
Azərbaycanın mərd oğlu 2016-cı ilin aprelində Talış yüksəklikləri uğrunda gedən şiddətli döyüşlərdə qəhrəmancasına canını verərək şəhadətə ucalıb.
Şəhid olduqdan sonra göstərdiyi igidliyə görə “İgidliyə görə” medalı ilə təltif olunub. Ölümündən sonra müxtəlif orden və medallara, həmçinin fəxri adlara layiq görülüb.
Allah rəhmət eləsin.
Zərintac Mayisqızı
