İranın keçmiş xarici işlər naziri, hazırda millət vəkili Mənuçehr Mottəki Azərbaycana qarşı əsassız və cəfəng iddialar irəli sürüb.
Zefer.media xəbər verir ki, bu barədə “Azad İran” məlumat yayıb.
Mottəki iddia edib ki, İsrailin İranın şimal bölgələrinə qarşı hücumu zamanı, bəzi ekspertlərin fikrincə, hücumlarda Azərbaycanın hava məkanından və hava limanlarından istifadə olunub.
Onun sözlərinə görə, guya İsrail qüvvələrinin yanacaq təminatı da Azərbaycandan həyata keçirilib. Deputat bildirib ki, Tehran Bakı ilə yaxşı əlaqələr qurmaq istəsə də, bu məsələlərə “aydınlıq gətirilməlidir”.
İsrail səfirliklərini casusların cəlb edilməsi üçün “baza” adlandıran Mottəki, bu fəaliyyətlərin Şimali İraq, Bakı və Əbu-Dabi kimi bölgələrdə həyata keçirildiyini iddia edib. O, xüsusilə BƏƏ-ni də hədəf alaraq, həmin ölkənin bu məsələdə “ən pis nəticəni göstərdiyini” deyib.
O, Azərbaycanı, İraqı və Fars körfəzində yerləşən ABŞ bazalarını qeyd edərək bu istiqamətdə “müəyyənləşdirmə” aparılmasının vacibliyini irəli sürüb.
İranın daxilindəki rejimin, bəzi qüvvələrin Azərbaycana qarşı bu cür təxribat xarakterli çıxışları ilk dəfə deyil. Tez-tez belə sərsəmləyirlər. Lakin Azərbaycanın sülhpərvər, balanslı siyasəti, müharibə edən tərəflərin heç birinə haqq qazandırmaması, danışıqlara səsləməsi kimi uğurlu fəaliyyəti Prezident İlham Əliyevin güclü siyasətində açıq şəkildə görmək mümkündür. Öz çirkin əməllərini həyata keçirməyə çalışanlar isə bunları rahatlıqla görməzdən gələ bilir. Məqsəd qarışıqlıq yaratmaq, ölkəmizi nüfuzdan salmaqdır…
Zərintac Mayisqızı
