Azərbaycan Prezidenti İlham Əliyev bu gün Estoniyanın ölkəmizdə yeni təyin olunmuş fövqəladə və səlahiyyətli səfiri Tiyna Nirki qəbul edib.
Zefer.media bildirir ki, görüş zamanı səfir etimadnaməsini Prezidentə təqdim edib.
İlham Əliyev Azərbaycan-Estoniya əməkdaşlığının genişləndirilməsi üçün qarşılıqlı səfərlərin və müxtəlif səviyyələrdə əlaqələrin əhəmiyyətini qeyd edib.
Azərbaycanla Avropa İttifaqı arasında münasibətlərin inkişafını vurğulayan dövlət başçısı bu il Avropa İttifaqı Şurasının Prezidenti Antonio Koştanın, Avropa Komissiyasının Prezidenti Ursula fon der Lyayenin, Aİ-nin xarici işlər və təhlükəsizlik siyasəti üzrə ali nümayəndəsi, Avropa Komissiyasının vitse-prezidenti Kaya Kallasın ölkəmizə səfərləri barədə danışıb.
Dövlət başçısı səfirə fəaliyyətində uğurlar arzulayıb.
Tiyna Nirk Azərbaycanla Estoniya, eləcə də ölkəmizlə Avropa İttifaqı arasında münasibətlərin inkişafı üçün bütün səylərini göstərəcəyinə əmin edib.
Səfir Azərbaycanın Orta Dəhlizdə mühüm mövqeyə malik olduğunu qeyd edib. O, siyasi dialoq, biznes, informasiya texnologiyaları, logistika və digər istiqamətlər də daxil olmaqla, bir çox sahələrdə tərəfdaşlığın genişləndirilməsi üçün yaxşı potensialın olduğunu vurğulayıb.
Tiyna Nirk təhsil sahəsində əməkdaşlıq üçün geniş imkanlara da toxunaraq, Estoniyada 200-ə yaxın azərbaycanlı tələbənin təhsil aldığını bildirib.
Səfir Azərbaycanın Ukraynaya göstərdiyi humanitar yardımı yüksək qiymətləndirib.
Görüşdə Estoniyanın Azərbaycanda səfirliyinin açılmasının ikitərəfli münasibətlərin gələcək inkişafına mühüm töhfə verəcəyi vurğulanıb. Ticarət-iqtisadi əməkdaşlıq üzrə hökumətlərarası komissiyanın fəaliyyəti ilə bağlı məsələlərə toxunulub və qarşılıqlı maraq doğuran digər mövzular müzakirə edilib.
