Fransa İsrailin Livan ərazisindəki hərbi əməliyyatlarını dəstəkləmir və ABŞ ilə İran arasında bağlanan atəşkəsin Livan ərazisinə də şamil edilməli olduğuna inanır.
Zefer.media xarici mənbəyə istinadən xəbər verir ki, bu barədə Fransanın xarici işlər naziri Jan-Noel Barrot Fransız Radiosuna bildirib.
“Livan ABŞ və İran arasında əldə edilən atəşkəsdən qıcıqlanan bir hökumətin qurbanı olmamalıdır. Livanın məhv edilməsi, Livan dövlətinin məhv edilməsi Hizbullahı məhv etməyəcək; əksinə, onu gücləndirəcək. Buna görə də, Livan mütləq bu atəşkəsə, danışıqların başlamasına imkan verəcək müvəqqəti və kövrək atəşkəsə daxil edilməlidir”, – nazir bildirib.
Barrot həmçinin İsrail ilə münasibətlərin gərginləşməsinə görə Hizbullahı günahlandırıb və 8 apreldə İsrailin Livana hücumlarını “qəbuledilməz” adlandırıb. Nazir əlavə edib ki, bu hücumlar xüsusilə ABŞ və İran arasında əldə edilən müvəqqəti atəşkəsi təhlükə altına qoyduğu üçün qəbuledilməzdir və nəticədə 250-dən çox insan həlak olub.
Aytən Yalçınqızı
