Məlum olduğu kimi, fevralın 19-da xaricdə yaşayan bir neçə anti-milli ünsür aqressiv və təhrikedici formada Prezident İlham Əliyevin qaldığı hotelin qarşısında təxribat törətməyə çalışıblar. Onlar kifayət qədər qeyri-etik davranışları ilə diqqəti cəlb edərək və öz mənəviyyatlarına uyğun ifadələr işlədərək təhlükəsizlik kordonunu yarmağa və zorla hotelə daxil olmağa cəhd göstəriblər.
Məsələ ilə bağlı Amerikalı təhlükəsizlik üzrə ekspert İrina Tsukerman açıqlama verib.
O, hadisənin arxasındakı ABŞ-dakı ən böyük erməni lobbi təşkilatı olan – ANCA-nın dayandığını bildirib:
“ANCA belə bir addımı atmaqla Azərbaycan əleyhinə rəsmi təzyiqə, reputasiya zədələnməsinə və Konqres səviyyəsində addımlara çevrilə biləcək situasiyalar yaratmağa çalışır. ANCA illərdir ABŞ-ın Cənubi Qafqaz siyasətini daxili siyasi mübarizə meydanına çevirən bir siyasi mexanizm qurmağı hədəfləyir.
Bu mexanizmin üç sabit xüsusiyyəti var: Azərbaycan haqqında sadələşdirilmiş mənəvi narrativ irəli sürmək, həmin narrativə uyğun media üçün cəlbedici hadisələr yaratmaq və ya onlardan istifadə etmək, daha sonra isə bu hadisələri konqresmenlər və hakimiyyət kanalları vasitəsilə yaymaq”.
Tsukerman qeyd edib ki, Vaşinqton təxribatında ANCA üçün ideal ssenari əvvəlcədən qurulmuş hekayəni gücləndirə biləcək “fiziki müdaxilə” görüntüsü yaratmaq idi:
“Xarici ölkə liderinin mühafizə xidmətinin ABŞ paytaxtında insidentə cəlb olunması cəhdi bu planın tərkib hissəsidir. Təxribatın mexanizmi yaxınlaşma və insident yaratmaqdır. Çünki mühafizəçilərin fiziki müdaxilə etməsi ən çox belə məqamlarda baş verir. Nəticədə, onlar adi toxunuşu belə “nümayişçilərə hücum” şəkilində tirajlamağa başlayırlar”.
Ekspert əlavə edib ki, toqquşmadan sonra ANCA-nın sürətli reaksiyası təsadüfi deyil.
Onun sözlərinə görə, belə məqamda və belə məkanda qarşıdurma yaratmaq planlı strategiyanın tərkib hissəsidir. Sürətli reaksiya isə informasiyanı “kilidləmək” üsuludur.
Yəni ilk yüksək səslə deyilən versiya hadisəyə baxış üçün əsas çərçivəni formalaşdırmaq cəhdidir:
“Onlar dərhal reaksiya verərək, hadisəni “mühafizəçilər dinc etirazçılara hücum etdi” kimi tirajlayırlar. Çünki sonrakı açıqlamalar, hadisənin əslində necə baş verməsi ilə bağlı faktlar artıq oxucular tərəfindən bəhanə kimi qəbul edilir, onlar ilk versiyanı doğru hesab edirlər.
Ekspert vurğulayıb ki, illərlə formalaşmış və sürətli səfərbərlik təcrübəsinə malik şəbəkə məhz belə situasiyalarda xüsusilə təsirli olur. Bu şəbəkə qısa müddətdə sosial medianı eyni tezislərlə doldura, jurnalistlərə hazır mətn və arqumentlər təqdim edə bilir.
İ.Tsukermanın fikrincə, ANCA-nın keçmiş fəaliyyəti də onun niyə bu qədər sürətli hərəkət etdiyini göstərir. Təşkilat illərdir münaqişə xarakterli epizodları Konqres səviyyəsində siyasi təzyiq alətinə çevirən sistem qurub. Məqsəd isə Bakı-Vaşinqton münasibətlərini zəiflətmək və Azərbaycanın Vaşinqtondakı təsir imkanlarını məhdudlaşdırmaqdır”. (Bizim.media)
