Çin hökuməti suverenlik mübahisəsi olan Tayvanla münasibətləri yaxşılaşdırmaq üçün 10 maddəlik siyasət paketi elan edib.
Zefer.media xarici KİV-ə istinadən xəbər verir ki, Çin Kommunist Partiyasının (ÇKP) Tayvan Araşdırmaları Ofisinin açıqlamasına görə, siyasət paketi ada ilə materik arasında əlaqələri artırmağı və möhkəmləndirməyi hədəfləyir. Bu paket iki ölkənin siyasi partiyaları arasında ünsiyyət mexanizminin yaradılmasından tutmuş səyahət məhdudiyyətlərinin aradan qaldırılmasına qədər müxtəlif istiqamətləri əhatə edir.
Paket ÇKP ilə Tayvanın əsas müxalifət Millətçi Partiyası (Koumintang/KMT) arasında müntəzəm ünsiyyət mexanizminin yaradılmasını və Tayvan boğazının hər iki tərəfindəki gənclər arasında qarşılıqlı əlaqələr üçün birgə institusional platformanın yaradılmasını təklif edir.
Bundan başqa, paketdə Çinin Fujian əyaləti ilə Tayvan materiki yaxınlığındakı Kinmen və Matsu adaları arasında su, elektrik enerjisi və təbii qazın paylaşılması, habelə iki bölgəni birləşdirən dəniz körpüsünün tikintisi təklifləri yer alır.
Paketin bir hissəsi olaraq, hələ COVID-19 pandemiyası zamanı Çin materikindəki müəyyən şəhərlər ilə Tayvan arasında dayandırılan bəzi müntəzəm uçuşlar yenidən başlayacaq, Fujian və Şanxay sakinlərinə Tayvanı turist kimi ziyarət etməyə icazə veriləcək, Fujian əyalətinin Siamen şəhərindəki yeni hava limanı Kinmen adasının sakinlərinin istifadəsi üçün açılacaq.
Tayvanın kənd təsərrüfatı və balıqçılıq məhsullarının Çin bazarına çıxışı üçün karantin standartlarını təmin etmək məqsədilə kommunikasiya mexanizminin yaradılması təklifini ehtiva edən paketdə, həmçinin adanın qida istehsalçılarının qeydiyyat prosesinin materik bazarına çıxışı təmin etmək üçün sadələşdiriləcəyi bildirilir.
Paketdə, həmçinin Tayvanın dəniz balıqçı gəmilərinin lövbər salması üçün körpü və dokların tikintisi və materik sularında tutulan balıqların satışını asanlaşdırmaq da əks olunub. Eyni zamanda, Tayvandan kiçik məhsulların ticarəti üçün bazar imkanlarının araşdırılacağı və adanın mikro, kiçik və orta müəssisələrinin materik bazarına daxil olması üçün dəstək veriləcəyi bildirilir.
Bundan əlavə, paketdə qeyd olunur ki, materikdə Tayvan istehsalı olan televiziya proqramlarının, sənədli filmlərin və cizgi filmlərinin nümayişinə dəstək veriləcək, ada vətəndaşları materikdə mikrodram istehsalında iştirak edə biləcəklər.
Zərintac Mayisqızı
