Yay mövsümündə çoxumuz çimərliklərə gedirik. Lakin vacib məqamları diqqətdən qaçırmaq bədbəxt hadisələrlə nəticələnə bilər. Zaman-zaman xoşagəlməz xəbərlərin şahidi oluruq. Bunların baş verməməsi üçün təhlükəsizliyə dair məlumatları diqqətdən qaçırmaq olmaz.
Təhlükəsizlik eksperti Samir Nəbiyev Zefer.media-ya açıqlamasında deyib ki, suya girməzdən əvvəl icazə verilmiş və nəzarət olunan çimərliklərdən istifadə edilməlidir:
“Bilirik ki, faktiki şəkildə qadağa edilən yaxud icazə verilən ərazilər var. Həmçinin çimərliklərdə artıq havanın dəyişməsini nəzərə alaraq üzüb-üzməyəcəyimizə qərar veririk. Zəruri qaydalara habelə daxildir: alkoqollu və digər spirtli içkiləri qəbul etdikdən sonra suya girmək yolverilməzdir. Yeməkdən dərhal sonra suya daxil olmaq qadağandır, suda olarkən xilasetmə xidmətinin müəyyən etdiyi sərhədləri keçmək yanlışdır. Güclü dalğa, külək və ya axın zamanı da suya girməyin. Həmçinin, çalışaq ki, dənizdə tək üzməyək, yorğun halda da çimməyin”.
Ekspert uşaqlara nəzarətdən də danışıb:
“Onlar nəzarətsiz dənizə, çimərliyə buraxılmamalıdır. Dərinliyi məlum olmayan yerlərdə nə böyüklər, nə də balacalar suya tullanmasınlar. Üzgüçülük bacarığı olmayan azyaşlılar xilasedici jiletlərlə təmin edilməlidir. Onu da sonda əlavə edim ki, günvurmadan qorunmaq üçün saat 11:00 və 17:00 aralığında günəş altında uzun müddət qalmaq, hər hansı bir şəkildə günəş vannası qəbul etmək qadağandır. Sözügedən hallarda günəşdən qoruyan krem vurulmalıdır, papaq taxılmalı və kifayət qədər maye qəbul etmək gərəklidir”.
Zərintac Mayisqızı
