Bakı Gənclər Mərkəzində Beynəlxalq Konfutsi İnstitutu Gününə, qədim Çin filosofu və mütəfəkkiri Konfutsinin doğum gününə həsr olunmuş bayram tədbiri təşkil edilib.
Bu barədə Zefer.media Azərtac-a istinadən xəbər verir.
Azərbaycan Dillər Universitetinin (ADU) Konfutsi İnistitutundan bildirilib ki, “Birlikdə sülh naminə” devizi altında təşkil edilən tədbir Çin dilini, adət-ənənələrini və mədəniyyətini təbliğ etmək, Azərbaycan-Çin mədəni dialoqunu genişləndirmək və iki ölkə gəncləri arasında dostluğu möhkəmləndirmək məqsədi daşıyıb. Tədbirdə çıxış edən Çinin Azərbaycandakı səfirliyinin müşaviri Din Tao qeyd edib ki, ADU-nun Konfutsi İnstitutu yarandığı gündən bəri on il ərzində iki ölkə arasında Çin dilinin tədrisi və mədəni mübadilələrdə fəal iştirak edib. Bildirib ki, Konfutsi İnstitutu çinşünaslıq sahəsində çoxsaylı gənc istedadlar yetişdirib və Azərbaycan ictimaiyyəti üçün Çin sivilizasiyasının və dilinin unikal dünyasına informasiya “pəncərəsi”, iki ölkə arasında praqmatik təhsil əməkdaşlığı və mədəni inteqrasiya modeli olub.
Tədbirin bədii hissəsi gənc istedadların iştirakı ilə canlı audiovizual müşayiətlə konsertlə başlayıb. Konfutsi İnstitutunun tələbələri Çin mədəniyyətinin inklüziv və mütərəqqi ruhunu nümayiş etdirərək “Minilliyin arzusu” adlı Çin rəqsini, “Mulan balladası” klassik şeirini, Pekin operasından “Məbədi dağıdan ilahə” parçalarını və transformasiya və dəyişən maskaları özündə əks etdirən klassik Siçuan opera tamaşasını ifa ediblər.
Sonda tədbir iştirakçılarına Konfutsi İnstitutunun direktoru Rafiq Abbasovun “Azərbaycan – Çin: Prezident salnaməsi” kitabı hədiyyə edilib.
