28 Aprel – Ümumdünya Əməyin Mühafizəsi Gününə həsr olunmuş “5-ci İllik SƏTƏM Konfransı” “Risk Menecment Peşəkarları” (RMP) İctimai Birliyi və İslam Əməkdaşlıq Təşkilatının Əmək Mərkəzinin birgə təşkilatçılığı ilə 25 aprel 2026-cı il tarixində “Radisson Hotel Baku”-da baş tutub.
Zefer.media xəbər verir ki, Azərbaycan və digər ölkələrdən SƏTƏM sahəsində fəaliyyət göstərən mütəxəssisləri bir araya gətirən bu konfransda SƏTƏM, Keyfiyyət və biznesin müxtəlif istiqamətləri üzrə aktual məsələlər müzakirə edilib.
SƏTƏM sahəsində qabaqcıl yanaşmaların təşviqi üçün əhəmiyyətli və mühüm rol oynayan bu konfransın əsas məqsədi əməyin mühafizəsi və sağlamlıq sahəsində maarifləndirməni artırmaq, qabaqcıl təcrübələrin mübadiləsinə təkan vermək, innovativ yanaşmaları ön plana çıxarmaq və bu sahədə həm yerli, həm də beynəlxalq səviyyədə əməkdaşlıq imkanlarını genişləndirməkdir.
Saat 09:00-dan 13:00-a qədər davam etmiş bu tədbirdə 170 nəfərdən çox yerli və xarici şirkət nümayəndələri ilə yanaşı ali təhsil müəssisələri də (AzTU, ADNSU, BDU, MAA, BANM, BSU, BMU, SDU və s.) aktiv iştirak edib.
Tədbirdə beynəlxalq səviyyədə SƏTƏM sahəsində uğurlu nailiyyətlər qazanmış IOSH (Böyük Britaniyanın Əməyin Mühafizəsi və Sağlamlıq İnstitutu) və AITT (Sənaye Yük Qaldırma Texnikası Təlimçiləri Assosiasiyası) akkreditasiya qurumları, ILO (Beynəlxalq Əmək Təşkilatı) və digər beynəlxalq təşkilatların iştirakı ilə maraqlı çıxışlar təqdim olunub.
Qanunvericilikdə olan son dəyişikliklər və digər istiqamətlər üzrə təcrübə mübadiləsinin aparılması məqsədilə Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidməti, Milli Məclis, SOCAR, AzTelekom və digər qurumların nümayəndələrinin iştirakı ilə sahənin peşəkar spikerlərinin çıxışları baş tutub.
Habelə, tədbir çərçivəsində SƏTƏM sahəsində çalışan mütəxəssislər üçün praktiki əhəmiyyət daşıyan “SƏTƏM – Mütəxəssis Bələdçisi” kitabının təqdimat mərasimi təşkil olunub.
Konfrans zamanı iştirakçılar üçün fərdi qaydada hazırlanmış sorğu və interaktiv yarışma keçirilib. Sonda isə yarışma zamanı ən uğurlu nəticə göstərən iştirakçılara mükafatlarla yanaşı sertifikatlar da təqdim edilib.
Eyni zamanda tədbir sonunda bütün iştirakçılara iştirak sertifikatı verilib.
Qeyd edək ki, RMP birliyi Azərbaycanda bu kimi tədbirlərin keçirilməsini SƏTƏM sahəsində qabaqcıl təcrübələrin paylaşılması və yerli-qlobal əməkdaşlıqların gücləndirilməsi məqsədilə həyata keçirir.
Lalə Qurbanlı
Qəmər Kazımzadə
