Dünya bazarlarında neftin qiyməti açıqlanıb. Hazırda “Brent” markalı neft 96,35 dollara, yüngül neft isə 97,99 dollara təklif edilir. Həmçinin “Azəri Layt” markalı Azərbaycan neftinin 1 barrelinin qiyməti 4,59 ABŞ dolları və ya 3,8% artaraq 125,03 ABŞ dolları olub.
Bəs, görəsən dünya bazarındakı bahalaşma ölkədaxili yanacaq qiymətlərinə nə dərəcədə təsir edə bilər?
Mövzu ilə bağlı Zefer.media–ya açıqlama verən Liberal İqtisadçılar Mərkəzinin sədri Akif Nəsirli bildirib ki, dünya bazarında neftin bahalaşması adətən yanacağın maya dəyərini artırır:
“Amma Azərbaycanda həmin təsir birbaşa və dərhal hiss olunmur. Səbəb odur ki, ölkədə yanacaq qiymətləri tam bazar prinsipi ilə yox, dövlət tərəfindən tənzimlənir.
Məsələn, “Brent” və “Azeri Light” kimi neft markalarının qiyməti artsa da, bu avtomatik olaraq benzinin və dizelin qiymətinin eyni sürətlə qalxacağı demək deyil. Dövlət qiymətləri sosial və iqtisadi vəziyyəti nəzərə alaraq müəyyən edir”.
Akif Nəsirli əlavə edib ki, uzun müddət neft bahalaşması davam edərsə, müəyyən dolayı təsirlər yarana bilər:
“Məsələn, idxal olunan yanacaq növlərinin və ya bəzi xərclərin artması nəticəsində gələcəkdə qiymətlərin yenidən nəzərdən keçirilməsi mümkündür.
Qısa desək, qlobal bazarda neft bahalaşsa da, Azərbaycanda yanacaq qiymətləri yalnız dövlət qərarı ilə dəyişir və bu dəyişiklik adətən gecikmiş və məhdud olur”.
Aytən Yalçınqızı
