Azərbaycan Ermənistandan ilk dəfə mal idxal etdi. Bu ilin mart ayında Azərbaycan Ermənistandan ilk dəfə 960 ABŞ dolları dəyərində mal idxal edib. Bu barədə Dövlət Gömrük Komitəsi məlumat yayıb.
Bundan başqa, bu ilin I rübündə Azərbaycan Ermənistana 5 milyon 757 min ABŞ dolları dəyərində məhsul ixrac edib. Bunun 1 milyon 537 min dollarlıq hissəsi mart ayının payına düşüb.
Ermənistana ixracdan əldə olunan gəlirlər Azərbaycanın ümumi ixrac gəlirlərinin 0,1%-ni təşkil edib.
Azərbaycan Milli Məclisinin VI və VII çağırış deputatı, iqtisadçı Vüqar Bayramov Zefer.media-ya bildirib ki, Azərbaycan sülh gündəliyinə sadiq qalaraq Ermənistana enerji məhsullarının ixracını həyata keçirir:
“Eyni zamanda, Azərbaycan ərazisi üzərindən Ermənistana daşınan yüklərlə bağlı bütün məhdudiyyətlər aradan qaldırılıb. Bu addımlar ölkənin regionda sülhə verdiyi töhfəni və göstərdiyi dəstəyi bir daha təsdiqləyir.
Xüsusilə, Zəngəzur dəhlizinin istifadəyə verilməsi və ümumilikdə kommunikasiyaların bərpası, eləcə də tranzit imkanları üzərindən iqtisadi əlaqələrin genişləndirilməsi mühüm əhəmiyyət kəsb edir.
Bu proseslər regionda dayanıqlı sülhün formalaşmasına ciddi töhfə verə bilər.
Aparılan qiymətləndirmələr göstərir ki, Azərbaycan və Ermənistan arasında 38 məhsul üzrə qarşılıqlı idxal-ixrac əməliyyatlarının qurulması mümkündür. Bu isə o deməkdir ki, iqtisadi əlaqələrin tam bərpası halında iki ölkə arasında illik ticarət dövriyyəsi təxminən 300 milyon ABŞ dolları səviyyəsində formalaşa bilər. Bu rəqəmə həm Azərbaycandan Ermənistana, həm də Ermənistandan Azərbaycana ixrac daxildir”.
Deputat Vüqar Bayramov əlavə edib ki, bununla yanaşı, Zəngəzur dəhlizinin açılması regiondan keçən yükdaşımaların həcmini əhəmiyyətli dərəcədə artıracaq:
“Bu isə yalnız Azərbaycan və Ermənistan üçün deyil, bütövlükdə region ölkələri üçün əlavə iqtisadi imkanlar yaradacaq. Tranzit yükdaşımalarından əldə olunan gəlirlərin artması həm dayanıqlı sülhün möhkəmlənməsi, həm də regionun iqtisadi inkişafı baxımından xüsusi əhəmiyyət daşıyır”.
Aytən Yalçınqızı
