Avstraliya hökuməti H5N1 quş qripi epidemiyasının mümkün yayılması ilə bağlı yaranan “psixososial risk” səbəbindən Makkuori adasındakı alimləri müvəqqəti olaraq təxliyə etmək qərarına gəlib.
Zefer.media “Xinhua”ya istinadən xəbər verir ki, İqlim Dəyişikliyi, Enerji, Ətraf Mühit və Su Departamentinin (DCCEEW) məlumatına görə, Avstraliya Antarktika Proqramının tədqiqat stansiyasında çalışan əməkdaşlar geri çağırılacaq. Makkuori adası Avstraliya ərazisi olmaqla materikdən təxminən 2 min kilometr cənub-şərqdə yerləşir.
Departament bildirib ki, yüksək patogenliyə malik H5N1 quş qripi virusu adada indiyədək aşkarlanmayıb. Lakin ekspertlər qarşıdakı çoxalma mövsümündə heyvanlar arasında genişmiqyaslı tələfat ehtimalının yüksək olduğunu proqnozlaşdırırlar.
1997-ci ildə universal dəyərinə görə UNESCO-nun Dünya İrsi Siyahısına daxil edilən adada il ərzində müxtəlif vaxtlarda 100 minə qədər suitilər və milyonlarla dəniz quşu yaşayır. Burada 850 mindən çox kral pinqvini cütü də məskunlaşıb.
DCCEEW-nin nazir müavini Şon Sallivan bildirib ki, insanların H5 quş qripinə yoluxma riski aşağı qiymətləndirilir, lakin çox sayda yoluxmuş heyvanın yaxınlığında yaşamağın yaratdığı psixoloji və sosial riskləri nəzərə almamaq mümkün deyil.
Avstraliya Antarktika Proqramının əsas tədqiqat və təchizat gəmisi RSV Nuyina sentyabrın sonu və ya oktyabrın əvvəlində adaya gedərək 24 alim, texniki və dəstək əməkdaşını, həmçinin vacib yükləri geri gətirəcək.
Mütəxəssislər adadakı vəziyyətin monitorinqinin mümkün yollarını nəzərdən keçirirlər. Sallivan Avstraliyanın Makkuori adasında uzunmüddətli fəaliyyətini davam etdirmək niyyətində olduğunu bildirib.
Aytən Yalçınqızı
