Bu gün akademik Zərifə xanım Əliyevanın anım günüdür.
Zefer.media xəbər verir ki, Zərifə Əliyeva 28 aprel 1923-cü ildə Naxçıvan Muxtar Respublikasının Şərur rayonunun Şahtaxtı kəndində gələcəyin görkəmli dövlət və elm xadimi Əziz Əliyevin və Leyla xanım Əliyevanın ailəsində dünyaya göz açıb.
Elə həmin ilin may ayında ailəsi Bakıya köçüb. O zaman Sankt-Peterburq Tibb Akademiyasının 2-ci kurs tələbəsi olan Əziz Əliyev Rusiyada təhsilini yarımçıq qoymağa və ali tibb təhsilini Bakıda davam etdirməyə məcbur olub.
Zərifə Əliyeva ailədə ikinci övladdır. Qardaşları həkim, Tibb elmləri doktoru Tamerlan Əliyev və akademik Cəmil Əliyev, bacısı pianoçu Gülarə Əliyevadır.
Oftalmoloq-alim Zərifə xanım Azərbaycanın siyasi və dövlət xadimi, Azərbaycan Kommunist Partiyası Mərkəzi Komitəsinin birinci katibi, Azərbaycan Respublikasının üçüncü Prezidenti Heydər Əliyev ilə ailə həyatı qurub. 12 oktyabr 1955-ci ildə qızı Sevil Əliyeva, 24 dekabr 1961-ci il tarixində oğlu, Azərbaycan Respublikasının gələcək Prezidenti İlham Əliyev dünyaya gəlib.
Elmi fəaliyyətinə nəzər saldıqda o, 1960-1967-ci illərdə Oftalmologiya İnstitutunda böyük elmi işçi vəzifəsində çalışıb.
1963-cü ildə SSRİ Ali Attestasiya Komissiyası tərəfindən «Oftalmologiya» ixtisası üzrə böyük elmi işçi adına layiq görülüb.
1967-ci ildə görkəmli akademik Azərbaycan Dövlət Həkimləri Təkmilləşdirmə İnstitutunun göz xəstəlikləri kafedrasına dosent vəzifəsinə dəvət edilib.
1977-ci ildə Zərifə Əliyevaya tibb elmləri doktoru alimlik dərəcəsi verilib. Onun “Azərbaycanın bir sıra kimya müəssisələri işçilərinin görmə orqanının vəziyyəti” mövzusunda yazdığı dissertasiya işi oftalmologiyanın bu sahəsində ilk işlərdən biri olub.
Doktorluq dissertasiyasını müdafiə etdikdən sonra o, Azərbaycan Dövlət Həkimləri Təkmilləşdirmə İnstitutunun Oftalmologiya kafedrasının professoru seçilir və həmin kafedranın müdiri olub.
Böyük xidmətlərinə, çoxillik elmi-tədqiqat işlərinə görə professor 1983-cü ildə Azərbaycan Milli Elmlər Akademiyasının akademiki seçilib.
Böyük professor onlarca elmlər doktoru və fəlsəfə doktorunun elmi rəhbəri və məsləhətçisi olub. Çox sayda beynəlxalq qurultay, konqres, simpoziumlarda iştirak edib. Z. Əliyevanın təşəbbüsü və təşkilatçılığı ilə Bakıda ilk dəfə Ümumittifaq Oftalmoloqlar Cəmiyyəti İdarə Heyətinin Plenumu keçirilib. Bu plenumun keçirilməsi həm Azərbaycanda, həm də keçmiş İttifaqın ən yaxşı akademik müəssisələrində oftalmologiya xidmətinin inkişafında, habelə elmi-pedaqoji kadrların hazırlanmasında müstəsna rol oynayıb.
Oftalmoloq-alim 1985-ci il 15 apreldə dünyasını dəyişib. Professor, akademikin vəfatından 41 il ötür.
Zərintac Mayisqızı
