ABŞ Konqresi Rusiya və İrana qarşı yeni sanksiyaları nəzərdə tutan qanun layihəsini təsdiqləyib. Sənəd imzalanması üçün ABŞ Prezidenti Donald Trampa göndərilib.
Zefer.media Caliber-ə istinadən xəbər verir ki, ABŞ Nümayəndələr Palatasında keçirilən səsvermədə qanun layihəsinin lehinə 262, əleyhinə isə 159 səs verilib. Sənəd daha əvvəl Senatda da 86 səslə 11 səsə qarşı təsdiqlənib.
Qanun layihəsi Trampa Rusiyadan neft və qaz alan əsas ölkələrə, o cümlədən Çin və Hindistana 100 faizə qədər gömrük rüsumu tətbiq etmək səlahiyyəti verir. Sənəddə Rusiyanın enerji və müdafiə sektoruna, yüksəkvəzifəli şəxslərinə, banklarına, oliqarxlarına və “kölgə donanması”na qarşı sanksiyalar da nəzərdə tutulur.
Bundan əlavə, sənəd İranın enerji və silah sektorlarına qarşı sanksiyaların müddətini 2031-ci ilə qədər uzadır. Prezidentə müəyyən hallarda milli təhlükəsizlik əsaslandırması ilə sanksiyaların tətbiqini dayandırmaq imkanı da verilir.
Qeyd edək ki, qanun layihəsi mərhum senator Lindsi Qrehemin adı ilə adlandırılıb. Sənəd uzun müddət Konqresdə müzakirə olunub və Qrehemin ölümündən sonra onun qəbuluna dair proses sürətlənib. Layihənin qanuna çevrilməsi üçün hazırda Donald Trampın imzası tələb olunur.
Qəmər Kazımzadə
