Türkiyənin ev sahibliyi edəcəyi COP31 İqlim Sammitinə görə, Antalyada hazırlanan ərazi, tikililər və nəqliyyat infrastrukturu tədbirdən sonra da şəhərin beynəlxalq tanıtımına töhfə verəcək.
Zefer.media TRT Haber-ə istinadən xəbər verir ki, Türkiyənin Ətraf Mühit, Şəhərsalma və İqlim Dəyişikliyi Nazirliyinin məlumatına görə, noyabrın 9-20-də keçiriləcək BMT-nin İqlim Dəyişikliyi üzrə Çərçivə Konvensiyasının 31-ci Tərəflər Konfransı ilə bağlı hazırlıq işləri davam edir.
12 gün davam edəcək sammit başa çatdıqdan sonra yaradılan infrastruktur Antalyada qalacaq. COP31 üçün ayrılmış ərazi gələcəkdə beynəlxalq sərgilərin, konqreslərin və irimiqyaslı tədbirlərin keçirilməsi üçün daimi mərkəz kimi fəaliyyət göstərəcək.
190-dan çox ölkədən diplomatların, iş adamlarının, beynəlxalq təşkilatların nümayəndələrinin və media təmsilçilərinin Antalyada bir araya gəlməsi şəhərin yalnız turizm deyil, həm də beynəlxalq əməkdaşlıq və dayanıqlı inkişaf mərkəzi kimi tanıdılmasına imkan yaradacaq.
Aytən Yalçınqızı
