Məktəbdə azyaşlı şagirdin həyatını itirdiyi faciəvi hadisə cəmiyyətdə dərin sarsıntı yaradıb. Lakin hadisə yerindən məlumat yayan bəzi media nümayəndələrinin davranışı vətəndaşların və rəsmi qurumların haqlı narazılığına səbəb olub.
Hadisə şahidlərinin bildirdiyinə görə, ərazidə işləyən televiziya operatorundan dəfələrlə azyaşlı şagirdlərdən müsahibə almamaq, onların ağır psixoloji vəziyyətini nəzərə almaq xahiş edilib. Lakin bu müraciətlərə məhəl qoyulmayıb, çəkilişlər davam etdirilib və həyatını itirən şagirdin yaxınlarının razılığı olmadan görüntülər lentə alınıb. Şahidlərin sözlərinə görə, məhz bu etikadan kənar davranışlar hadisə yerində ciddi gərginlik yaradıb.
Çünki həyatında ilk dəfə belə ağır faciə ilə üzləşən, meyit görən uşaqlara “Hadisə necə baş verdi?”, “Onun hansı problemləri var idi?” kimi suallar verməyə çalışmaq peşəkar jurnalistika prinsiplərinə tamamilə ziddir.
Məsələ ilə bağlı Bakı Şəhəri üzrə Təhsil İdarəsi də açıqlama yayaraq həssas məqamlara diqqət çəkib. İdarə bir daha xatırladıb ki, belə hadisələr işıqlandırılarkən dəqiqlik və məsuliyyət prinsiplərinə riayət olunmalı, uşaqların qanunvericiliklə nəzərdə tutulmuş anonimliyi, psixoloji təhlükəsizliyi və mənafeləri qorunmalıdır. Açıqlamada azyaşlıların emosional vəziyyətinə mənfi təsir göstərə biləcək hər cür davranışdan çəkinməyin vacibliyi vurğulanıb.
Əlbəttə, baş verənlər fonunda operatora qarşı fiziki zorakılıq heç bir halda haqlı sayılmır və bu emosional addıma hüquqi qiymət verilməlidir. Ancaq hadisəni yalnız jurnalistin hüquqlarının pozulması kimi təqdim etmək, qarşıdurmaya zəmin yaradan əsas səbəbləri görməzdən gəlmək də obyektivlikdən uzaqdır. Jurnalistin hüquqları olduğu kimi, faciə yaşamış uşaqların və ailələrin də qorunan hüquqları var. Mətbuat azadlığı heç kimə azyaşlıların psixoloji təhlükəsizliyini və insan həssaslığını tapdalamaq haqqı vermir.
Məsələyə Mətbuat Şurasının əvvəlki sədri Rəşad Məcid də münasibət bildirərək media nümayəndələrinin üzərinə düşən məsuliyyəti xüsusi vurğulayıb:
“Jurnalistin hüquqları olduğu kimi, faciə yaşamış uşaqların və ailələrin də hüquqları var. Mətbuat azadlığı heç kimə azyaşlıların psixoloji təhlükəsizliyini, insanların şəxsi həyatını və faciə qarşısındakı həssaslığını nəzərə almamaq haqqı vermir. Peşəkar jurnalistika təkcə nəyi çəkməyi deyil, nəyi çəkməməyi, kimə sual verməyi deyil, hansı məqamda susmağı da bilməyi tələb edir. Çünki jurnalistikanın əsas prinsipi yalnız informasiya əldə etmək deyil, həm də insana hörmət etməkdir.”
Yekun olaraq, bu faciəvi hadisə bir daha göstərdi ki, baş verənlərə hüquqi qiymət verilməklə yanaşı, media nümayəndələrinin davranışları da peşə etikası baxımından ciddi şəkildə araşdırılmalıdır. Çünki heç bir eksklüziv kadr və ya xəbər azyaşlı bir uşağın psixoloji sağlamlığından və insan ləyaqətindən üstün ola bilməz.
