2026-cı il iyunun 20-də Moldova Azərbaycanlıları Konqresi paytaxt Kişinyovun Rışkanovka sektorunda yerləşən dahi Azərbaycan şairi və mütəfəkkiri Nizami Gəncəvinin abidəsi önündə ənənəvi iməcilik aksiyası təşkil edib.
Zefer.media xəbər verir ki, tədbir iştirakçıları parkın və ona bitişik ərazilərin abadlaşdırılması işlərini həyata keçiriblər.
Ərazi zibillərdən təmizlənib, yaşıllıq sahələri qaydaya salınıb, həmçinin oturacaqlar rənglənib. Birgə səylər nəticəsində abidənin ətrafı şəhər sakinləri və qonaqlar üçün daha səliqəli və rahat görkəm alıb.
İməcilik aksiyasında Moldova Azərbaycanlıları Konqresinin sədri Elçin Bayramov, Konqres Şurasının üzvləri Ramil Adıgözəlov, Marif Berqan və Rahim Səfərov, Konqresin üzvü Mehriban Bədəlova, Konqresin bazar günü məktəbinin müəllimi Səidə Səfərova, Azərbaycan icmasının ağsaqqalı Əli Bayramov, eləcə də digər fəallar və diasporun hörmətli nümayəndələri iştirak ediblər.
Tədbirə Azərbaycan Respublikasından gələn fəxri qonaqların qatılması ona xüsusi əhəmiyyət qazandırıb. Onlar Kişinyova Müslüm Maqomayevin xatirəsinə həsr olunmuş konsertdə iştirak üçün səfər ediblər. İməcilik aksiyasına Azərbaycan Respublikasının Mədəniyyət Nazirliyinin müşaviri Cahangir Səlimxanov, Diasporla İş üzrə Dövlət Komitəsinin nümayəndələri Tural Səfərov və Təhməsib Atakişiyev, həmçinin bir gün əvvəl mindən çox tamaşaçının iştirak etdiyi “Sevgi və dəniz” adlı musiqili xatirə gecəsində çıxış etmiş opera ifaçıları Aleksey Botnarçuk və Gülnarə Raylyanu da qoşulublar.
Nizami Gəncəvinin abidəsi önündə iməcilik aksiyasının keçirilməsi Moldova Azərbaycanlıları Konqresinin xoş və uzunillik ənənələrindən biridir. Dahi şairin abidəsinə qayğı göstərilməsi və ətraf ərazidə səliqə-sahmanın qorunması Azərbaycan xalqının zəngin mədəni irsinə hörmətin ifadəsi olmaqla yanaşı, şəhər məkanının abadlaşdırılmasına da töhfə verir.
Moldova Azərbaycanlıları Konqresi görülən işlərin təşkilinə göstərdiyi dəstəyə görə Kişinyov şəhərinin Rışkanovka sektorunun rəhbəri Mixail Furkulitsaya səmimi təşəkkürünü də bildirib.
