Azərbaycanın Milli Qəhrəmanı Mübariz İbrahimovun anım günüdür.
Zefer.media xəbər verir ki, şəhidimiz 7 fevral 1988-ci ildə, Biləsuvar rayonunun Əliabad kəndində anadan olub.
Onun atasının adı Ağakərim, anasının adı isə Şamamadır. Atası 16 oktyabr 2024-cü ildə vəfat edib. O, qardaşları Bəhruz və Rəşaddan sonra ailənin üçüncü övladı və sonbeşiyi idi. İbrahimovun qeydlərinə görə, o, seyid nəslindəndir. İbrahimov 1994-cü ildə Malik Piriyev adına Əliabad kənd ibtidai məktəbinə daxil olub. O, məktəbdə keçilən idman dərsləri ilə kifayətlənməyib rayona gedər, 12–13 yaşlarından idmanın boks növü ilə məşğul olardı.
Azərbaycanın igid övladı 2005-ci ildə orta təhsilini başa vurduqdan sonra hərbi xidmətə çağırılıb. Azərbaycan Daxili İşlər Nazirliyinə bağlı xüsusi təyinatlı qüvvələrdə xidmət etmiş İbrahimov 2007-ci ildə çavuş rütbəsi ilə hərbi xidmətini başa vurub. O, bir müddət mülki işdə çalışdıqdan sonra 2009-cu ilin sentyabr ayında gizir kurslarına daxil olub, sonra Naftalanda xidmət edib. Mübariz İbrahimov həmin ilin avqustunda könüllü şəkildə Azərbaycan Silahlı Qüvvələrində xidmət etmək üçün ərizə ilə müraciət edib, gizir kimi Tərtər rayonunda hərbi hissələrdən birində xidmət etməyə başlayıb.
Mübariz İbrahimov 2010-cu ilin 18 iyunundan 19-na keçən gecə bir məktub yazaraq, xidmət etdiyi bölmədə heç kimə xəbər vermədən Dağlıq Qarabağ təmas xəttinə doğru irəliləməyə başlayıb. O, Tərtər rayonunun Çaylı kəndində yerləşən Ermənistan Silahlı Qüvvələrinin zastavasına basqın edib və şəhadətə ucalıb. Baş tutan döyüş zamanı İbrahimov 4 erməni əsgərini öldürüb. Müxtəlif mənbələrə görə isə həmin rəqəm 45-dir. Azərbaycan Prezidenti İlham Əliyev Mübariz İbrahimov və Fərid Əhmədovun vida mərasimində Mübariz İbrahimovun 5 nəfəri öldürüb, 3-nü yaraladığını bildirib.
Döyüşdən sonra Mübariz İbrahimovun nəşi Ermənistan Silahlı Qüvvələrinin işğalı altındakı ərazilərdə qalıb, lakin Ermənistan tərəfi bunu uzun müddət təkzib edib. Aylarla davam edən danışıqlardan sonra oktyabrda Rusiyanın vasitəçiliyi ilə Həştərxan şəhərində imzalanan bəyannaməyə əsasən Mübariz İbrahimovun nəşi 6 noyabr 2010-cu ildə Azərbaycan tərəfinə təhvil verilib. O, İkinci Fəxri Xiyabanda dəfn edilib.
Zərintac Mayisqızı
