MDB müşahidə missiyası Ermənistanda seçkiqabağı prosesi izləməyə başlayıb.
Zefer.media xəbər verir ki, missiyanın açılışı çərçivəsində MDB müşahidə missiyasının rəhbəri, Birliyin baş katibinin müavini Nurlan Seitimov ilə Ermənistan Mərkəzi Seçki Komissiyasının sədri Vahaqn Hovakimyan arasında görüş keçirilib.
Həmsöhbətlər seçki kampaniyasının gedişatını və missiyanın fəaliyyətinin təşkilini müzakirə ediblər.
Görüşdən sonra Seitimov jurnalistlərə bildirib ki, missiyaya MDB ölkələrindən təxminən 120 müşahidəçinin daxil olması gözlənilir.
“Təxminən 120 müşahidəçi gözləyirik, amma əsas qrup seçkilərdən iki-dörd gün əvvəl gələcək. Hazırda səkkiz müşahidəçi tam ştatlı işləyəcək”, – o deyib.
Baş katibin müavininin sözlərinə görə, missiyanın vəzifəsi təşkilati və texniki məsələlərdir: xüsusilə, daha sonra bölgələrə gələcək müşahidəçilər üçün səfərlərin təşkili, onların seçki komissiyalarının üzvləri və əsas siyasi qüvvələrin qərargahları ilə görüşləri..
“MDB müşahidə missiyasının əsas prinsipi siyasi neytrallıq və seçki prosesinə və dövlətin daxili işlərinə müdaxilə etməməkdir. Qiymətləndirmələrimiz dövlət qurumları və seçki komissiyaları tərəfindən bizə verilən rəsmi məlumatlara, eləcə də öz müşahidələrimizə əsaslanacaq”, – Seitimov deyib.
O ifadə edib ki, missiya həm MDB üzv dövlətlərinin, həm də Beynəlxalq Parlament Assambleyası və digər beynəlxalq təşkilatların nümayəndələrindən ibarətdir.
Zərintac Mayisqızı
